Մինսկում կրկին սկսել են գործել բոլոր սոցիալական ցանցերը եւ բջջային ինտերնետը, հայտնում է «ՌԻԱ Նովոստի»-ն:
Տեղական ժամանակով մոտ 6.50-ին բոլոր սոցիալական ցանցերը` Facebook, WhatsApp, Telegram եւ այլն, սկսել են միաժամանակ աշխատել: Դրանք անջատվել էին կիրակի երեկոյան` օգոստոսի 9-ին, երբ հանրապետությունում նախագահական ընտրություններ էին անցկացվում:
Քվեարկությունից հետո, որի արդյունքներով, ըստ ԿԸՀ-ի, պետության գործող ղեկավար Ալեքսանդր Լուկաշենկոն հավաքել է ձայների 80.08 տոկոսը, ամբողջ երկրում բողոքի զանգվածային ցույցեր անցկացվեցին:
Երեքշաբթի երեկոյան չարտոնված ակցիաները շարունակվում էին, իրավապահները ցուցարարների դեմ արցունքաբեր գազ, ջրցաններ եւ լուսաձայնային նռնակներ են կիրառել:
Ինչպես հայտնել են հանրապետության ներքին գործերի նախարարությունից, երկուշաբթի երեկոյան անկարգությունների ընթացքում մեկ մարդ է զոհվել, երբ փորձում էր անհայտ պայթուցիկ սարք նետել իրավապահների ուղղությամբ:
