Ամբողջ Բելառուսում արդեն չորրորդ օրն է՝ բողոքի ինքնաբուխ ցույցեր են անցկացվում այն մարդկանց կողմից, ովքեր դժգոհ են ընտրությունների արդյունքներից։
Այսօր ամբողջ Բելառուսում կանայք ծաղիկներով փողոց են դուրս գալիս՝ ի նշան անվտանգության ուժերի դաժանության դեմ բողոքի:
TUT.by բելառուսական պորտալը հայտնում է լրագրողների եւ ցուցարարների կալանավորման մասին:
Կալանավորվել են «Ազատություն» ռադիոկայանի բելառուսական ծառայության քաղաքական վերլուծաբան Վիտալի Ցիգանկովը եւ նրա կինը՝ Օլգա Ցիգանկովան: Երկուսն էլ գտնվում են Մոսկովյան շրջանի ՆԳ բաժնում: Կալանավորել են նաեւ «Բելսատ»-ի լրագրողներ Լյուբով Լունեւային եւ Դմիտրի Սոլտանին, հայտնում է Ժուռնալիստների բելառուսական ասոցիացիան:
«Ճանապարհային ոստիկանը կանգնեցրեց մեքենան Նեմիգայի վրա եւ պահանջեց դուրս գալ,- ռադիոկայանին պատմել է Օլգա Ցիգանկովան: - Հաշվի առնելով բոլոր իրադարձությունները, երբ մարդկանց դուրս են հանում մեքենայից, ծեծի են ենթարկում եւ կալանավորում են, ես հրաժարվեցի: Ասացի, որ փաստաթղթերը մեքենայից ցույց կտամ: Ճանապարհային ոստիկանը շատ կտրուկ արձագանքեց, սկսեց իջեցնել ապակին, հարվածել մեքենային, ատրճանակը պահել գլխիս եւ պահանջել դուրս գալ: Այդ պատճառով ես առաջ քշեցի: Մեզ շրջապատեցին ճանապարհային ոստիկանության մի քանի մեքենաներ, Վիտալիին դուրս քաշեցին մեքենայից, ծեծեցին, ասֆալտին գցեցին։ Այժմ մենք գտնվում ենք Մոսկովյան շրջանի ՆԳ բաժնում»:
Մինսկում ՕՄՕՆ-ը պոմպային հրացաններից կրակ է բացել այն մարդկանց վրա, որոնք պատշգամբներից արձագանքել են բողոքող ցուցարարներին, հայտնում է Sputnik Belarus-ը:
«Ձերժինսկու պողոտայում, մետրոյի «Գրուշեւկա» կայարանի հարեւանությամբ հավաքվածների մոտ են վազել հատուկ ծառառյությունների աշխատակիցները։ Ցուցարարները փախուստի են դիմել: Մոտակա բարձրահարկ շենքերի պատշգամբներից մարդիկ բղավել են նրանց, թե որտեղ թաքնվեն, ի պատասխան «համակարգողների» ուղղությամբ մի քանի անգամ կրակել են պոմպային հրացաններից»,- գրում է գործակալությունը:
