Ինդոնեզիայի ոստիկանությունը նախատեսում է տեղական ավազակախմբների եւ համայնքների ղեկավարներին ներգրավել իշխանությունների` կորոնավիրուսի տարածման կապակցությամբ սահմանված կանոնների մասին իրազեկման բարձրացման աշխատանքներում, գրում է Jakarta Post-ը:
Ազգային ոստիկանության պետի տեղակալ, գեներալ Գատոտո Էդի Պրամոնոյի խոսքով` այս քայլն արվում է` հաշվի առնելով ոստիկանության աշխատակիցների եւ երկրի զինված ուժերի սահմանափակ թվաքանակը:
Նա նշել է, որ, միեւնույն ժամանակ, ոստիկանությունը կհետեւի, որ ավազակախմբերը չխախտեն մարդու իրավունքները հակակորոնավիրուսային միջոցառումների պահպանումը վերահսկելու ընթացքում:
«Մենք ավազակախմբերի անդամների չենք վարձում: Մենք նրանց ներգրավում ենք: Նրանք պարզապես հասարակության իրազեկվածության բարձրացման ոչ ֆորմալ մասն են»,- ասել է ազգային ոստիկանության պետի տեղակալը:
Ըստ Գատոտոյի` ավազակախմբերի եւ համայնքների ղեկավարների օգնությունը կարեւոր է կարգապահությանը հետեւելու ջանքերի ապահովման համար, հատկապես` դիմակներ կրելու եւ սոցիալական հեռավորության պահպանման հետ կապված:
Պարբերականը նշում է, որ Ինդոնեզիայում տեղական ավազակախմբերը կապված են անվտանգության ուժերի հետ այնպիսի թաղամասերում, ինչպիսիք են ավանդական շուկաները եւ կայանատեղերը` գումարի դիմաց ապահովելով նրանց անվտանգությունը:
