Մինչեւ այսօր երկու երկրների ԱԳ նախարարների հանդիպումներն ու հեռախոսազանգերը եղել են հումանիտար հրադադարի մասին: Այս մասին այսօր՝ հոկտեմբերի 21-ին, լրագրողների հետ զրույցում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը:
«Այսօրվա այցի մասին տեղեկություն չունեմ, բայց ենթադրում եմ, որ էլի հումանիտար հրադադարի հարցն է լինելու, որովհետեւ Լավրովը բոլոր իր ելույթներում նշում է, որ հրադադարի պահպանման վերիֆիկացիայի հարցն է քննարկվում: Սա նշանակում է, որ ինչ-որ մեխանիզմներ ներդրվեն, օրինակ, դիտորդներ բերվեն սահմանին կանգնեն եւ իրենք հետեւեն հրադադարի ռեժիմին:
Մեր տեղեկություններով մինչեւ հիմա Ադրբեջանը չի համաձայնել դրան, որովհետեւ նա չի դադարեցնում ռազմական գործողությունները: Այսինքն ագրեսիայի, հարձակման իր պլանը նա շարունակում է իրագործել: Փառք ու պատիվ մեր բանակին, որ այդ պլանը չի իրագործվում: Այս իրավիճակում ելքը զինված ուժով իրենց հետ շպրտելն է, մեզ որեւէ այլընտրանք թողնված չէ: Պետք է ուղղակի ջախջախել ու հետ շպրտել, ուրիշ ելք չկա»,-ասաց նա:
Հարցին, թե վերջնական լուծմանը հասնելու համար պե՞տք է դիմել Ռուսաստանին, Մարուքյանը պատասխանեց. «Ես չգիտեմ՝ դիմել են, թե չեն դիմել: ԱԳ փոխնախարարը ՀԱՊԿ-ի համար էր ասել, որ չեն դիմել: Եկեք չխառնենք, ՀԱՊԿ-ն իր ընթացակարգերն ունի: հստակ կարող եմ ասել, որ ՀԱՊԿ-ի հետ կապված դիմումի հարց չի քննարկվում: Իշխանությունը գտնում է, որ պետք չի դիմել:
Ինչ վերաբերում է Ռուսաստանին, արդեն Ռուսաստանն ունի իր վրա վերցրած մի հատ բեռ, որը դեռ չի իրագործվել՝ հումանիտար հրադադարը: Այսինքն միջնորդել է, կողմերին կանչել է, հովանավոր է կանգնել, այդ միջնորդությունը ողջունվել է մյուս համանախագահների, նաեւ ՄԱԿ-ի կողմից, բայց այդ հումանիտար զինադադարը չի պահպանվել: Իմ մոտեցումն այն է, որ պետք է Մոսկվայից պահանջել, որ նա իր միջնորդությամբ ԱԳ նախարարների այդ տեքստը կարողանա իրագործել: Ռուսաստանն ունի ձեւավորված իրավաքաղաքական հենք՝ հակաահաբեկչական գործողություն իրականացնելու»:
Ինչ վերաբերում է Հայաստանի դիրքորոշմանը, ԼՀԿ ղեկավարն ասաց. «Հայաստանի անկախության օրվանից սկսած Հայաստանի հայացքն ուղղված է Ռուսաստանին: Հայաստանն ունի մեկ ռազմավարական գործընկեր՝ Ռուսաստանը: Հայաստանը մի ռազմաքաղաքական կառույցի անդամ է, որը, ըստ էության, գլխավորում է Ռուսաստանը: Դրա այլընտրանքը չկա: Արեւմուտքը ողջունել է Ռուսաստանի միջնորդությունը: Այսինքն ՌԴ-ն ունի մանդատ, որ եթե հիմա միջամտի, որեւէ մեկը չի դատապարտելու դա: