Միացյալ Թագավորությունը ողջունում է այն փաստը, որ Հայաստանի եւ Ադրբեջանի ղեկավարները պայմանավորվել են դադարեցնել ռազմական գործողությունները Լեռնային Ղարաբաղում: Այս մասին ասվում է ԵԱՀԿ Մշտական խորհրդում Բրիտանական պատվիրակության տեղակալ Նիկոլա Մյուրեյի հայտարարության մեջ:
«Միանգամայն ակնհայտ է, որ քաղաքացիական բնակչության շրջանում զոհերի եւ տեղահանված անձանց թվի, ինչպես նաեւ COVID-19-ով վարակման դեպքերի թվի աճի ֆոնին հրատապ հրադադար էր անհրաժեշտ: Այդ գործողությունները կկանխեն հետագա մարդկային կորուստները եւ, հուսով ենք, կողմերին կմոտեցնեն լիարժեք բանակցային կարգավորմանը: Քանի որ մարտերը հանդարտվում են, եւ ձմեռ է սկսվում, մենք երկու կողմերին էլ հորդորում ենք առաջնահերթ համարել հումանիտար իրավիճակը` հատուկ ուշադրություն դարձնելով կանանց եւ երեխաների կարիքներին: Եվ ՄԱԿ ԳՀԳ-ն, եւ ԿԽՄԿ-ն պետք է լիարժեք աջակցություն ստանան` քաղաքացիական անձանց համար անհրաժեշտ օգնություն ցուցաբերելու համար: Մենք բոլոր կողմերին կոչ ենք անում գործել պատասխանատու եւ բարեխղճ կերպով` հրատապ հումանիտար օգնություն հասցնելու համար: Մեծ Բրիտանիան կցանկանար վերահաստատել իր աջակցությունը ԵԱՀԿ Մինսկի խմբին` որպես հիմնական ձեւաչափ, որի միջոցով ձեռք է բերվում ցանկացած վերջնական կարգավորում: Մադրիդյան սկզբունքները ամուր հիմք են ստեղծում հակամարտության տեւական կարգավորման համար, իսկ ՄԽ կառույցները հիմք են տալիս դրանց իրականացման համար: Մենք բոլոր կողմերին վճռականորեն կոչ ենք անում սերտորեն համագործակցել համանախագահների հետ` նրանց ջանքերին աջակցելու համար»:
