Սյունիքի մարզով ադրբեջանցիների անցումը չի ենթադրում ինքնիշխան միջանցքի առկայություն։ Այս մասին նոյեմբերի 19-ին Ազգային ժողովում ավանդական ճեպազրույցների ժամանակ ասաց իշխող «Իմ քայլը» դաշինքի պատգամավոր, Եվրոպական ինտեգրման հարցերի խորհրդարանական մշտական հանձնաժողովի նախագահ Արման Եղոյանը։
Խորհրդարանականի խոսքով՝ այս կետի հիմնական ձեւակերպումը կողմերի համաձայնությունն է առ այն, թե ինչ կառուցել, որտեղ կառուցել եւ արժե ընդհանրապես ինչ-որ բան կառուցել։
Ընդ որում՝ ինչպես նշեց խորհրդարանականը, ճանապարհների կամ ենթակառուցվածքների կառուցումը իրականացվելու է կողմերի համաձայնությամբ։
Նա նաեւ շեշտեց, որ այս պահին խոսքը անցում, քաղաքացիական բեռնափոխադրում թույլ տալու մասին է՝ այն նույն սկզբունքով, ինչպես տարածաշրջանի մյուս երկրների հետ։
«Սա ինքնիշխան միջանցք չէ, սա մեր տարածքն է։ Սյունիքի մարզում ոչ մի սանտիմետր հողի ինքնիշխանություն չի զիջվել։ Պարզապես քաղաքացիական բեռնափոխադրման թույլտվություն է տրվել»,- պարզաբանեց Եղոյանը։
Նա նաեւ ընդգծեց, որ ըստ ստորագրված փաստաթղթի՝ բոլոր ենթակառուցվածքները պետք է ապաարգելափակվեն։
«Սա նշանակում է, որ մենք նաեւ կարող ենք պահանջել ապագայում այլ ենթակառուցվածքների ապաարգելափակում։ Սակայն այս ամենը հետագա բանակցությունների հարց է»,- ասաց Եղոյանը։