Ռուսաստանի Դաշնության պաշտպանության նախարար, բանակի գեներալ Սերգեյ Շոյգուն, ով ՌԴ նախագահ Վլադիմիր Պուտինի հանձնարարությամբ աշխատանքային այց է կատարել Հայաստանի Հանրապետություն, Երեւանում հանդիպել է ՀՀ վարչապետ Նիկոլ Փաշինյանի եւ պաշտպանության նոր նախարար Վաղարշակ Հարությունյանի հետ: Այս մասին հայտնում է ՌԴ ՊՆ տեղեկատվության եւ հասարակայնության հետ կապերի դեպարտամենտը:
Հանդիպումների ժամանակ քննարկվել է ակտուալ թեմաների լայն շրջանակ, որոնք վերաբերում են Լեռնային Ղարաբաղում հրադադարի ռեժիմի պահպանմանն ու Ռուսաստանի, Ադրբեջանի նախագահների եւ Հայաստանի վարչապետի կողմից ստորագրված եռակողմ հայտարարության դրույթների իրականացմանը:
Սերգեյ Շոյգուն Նիկոլ Փաշինյանին եւ Վաղարշակ Հարությունյանին տեղեկացրել է Լեռնային Ղարաբաղի հակամարտության գոտում խաղաղապահ առաքելության ընթացքի, տեղում ռուսական խաղաղապահ կոնտինգենտի ստորաբաժանումների եւ դիտակետերի տեղակայման, մարտական գործողությունների դադարեցման համար մոնիթորինգի կազմակերպման, ինչպես նաեւ հումանիտար խնդիրների լուծման մասին:
«Մենք եկել ենք կոնկրետ առաջադրանքներով: Դուք գիտեք, որ եռակողմ հայտարարության ստորագրումից հետո խաղաղապահ կոնտինգենտ է տեղակայվել: Տեղակայվել է 23 դիտակետ: Մենք վերահսկում ենք Ստեփանակերտի ճանապարհը, ապահովում ենք փախստականների վերադարձը: Այժմ խաղաղ կյանքը կարգավորվել է: Եվ մեր հիմնական խնդիրն է արյունահեղությունը թույլ չտալը: Դա այն առաջադրանքն է, որը մեր առջեւ դրել է մեր Գերագույն գլխավոր հրամանատարը»,-ասել է Շոյգուն:
Իր հերթին, Նիկոլ Փաշինյանը շնորհակալություն է հայտնել Ռուսաստանին Լեռնային Ղարաբաղում խաղաղությունը վերականգնելու համար: «Պատերազմի ժամանակ մենք զգացել ենք Ռուսաստանի Դաշնության աջակցությունը: Բարդ ժամանակներ էին, սակայն ռազմաքաղաքական իրավիճակն այժմ փոխվել է»,-ասել է նա:
