Վարչապետ Նիկոլ Փաշինյանը որոշում է կայացրել, որ փոխվարչապետի գլխավորությամբ միջգերատեսչական հանձնաժողով ձեւավորվի, որը շատ արագ պետք է զբաղվի անհայտ կորած տղաների հարցերով։ Այս մասին այսօր՝ նոյեմբերի 23-ին, ՀՀ ՊՆ շենքի դիմաց բողոքող անհետ կորած զինծառայողների հարազատներին ասաց վարչապետի օգնական Նաիրի Սարգսյանը։
«Այսօր ժամը 14։00-ին, վարչապետի մոտ ընդլայնված կազմով խորհրդակցություն է եղել՝ անհայտ կորած տղաների հետ կապված հարցով։ Վարչապետը որոշում է կայացրել, որ փոխվարչապետի գլխավորությամբ միջգերատեսչական հանձնաժողով ձեւավորվի, որը շատ արագ պետք է զբաղվի անհայտ կորած տղաների հարցերով, եւ բոլոր ծնողներին պետք է հայտնեն, թե իրենց երեխաները որտեղ են գտնվում, ինչ վիճակում են, երբ է հնարավոր նրանց հայտնաբերել. ժամկետների, սոցիալական երաշխիքների հետ կապված բոլոր հարցերը պետք է մաքսիմալ կարճ ժամկետներում լուծվեն»-, ասաց նա։
Նաիրի Սարգսյանը հայտնեց, որ վարչապետն իրեն հանձնարարել է՝ հանդիպում կազմակերպել իր եւ անհետ կորած զինծառայողների հարազատների հետ. «Ես այդ նպատակով եմ եկել այստեղ, որպեսզի ցուցակագրենք, ձեր հեռախոսահամարները վերցնենք եւ հենց այս շաբաթ վարչապետի մոտ հանդիպումներ նախաձեռնենք։ Քանի որ մեծ թվով են քաղաքացիները, այդ պատճառով մի քանի հանդիպումներ կլինեն»։
