Չինական եւ ռուսական թվային ԶԼՄ-ները պետք է ամրապնդեն համագործակցությունն իրենց ռազմավարական գործընկերությանն ավելի շատ կենսական ուշ տալու համար: Այդ մասին հայտարարել են առցանց մեդիայի 2020 թվականի վեբինարի ռուս եւ չինացի մասնակիցները, հաղորդում է China Daily-ն:
Կիբերտարածության հարցերով կենտրոնական հանձնաժողովի գրասենյակի ղեկավարի տեղակալ Նյու Յիբինը դեկտեմբերի 18-ին՝ վեբինարի բացման արարողության ժամանակ, հայտարարել է, որ COVID-19-ի համավարակը հանգեցրել է համաշխարհային անկայունության եւ անորոշության զգալի մեծացմանը: Միակողմանի մոտեցումը, պրոտեքցիոնիզմը եւ հեգեմոնիզմը սպառնում են ամբողջ աշխարհում խաղաղությանն ու զարգացմանը: Միջազգային իրավիճակը բարդացել է, իսկ հակամարտություններն ու մարտահրավերները հաջորդել են մեկը մյուսին:
«Այդ բուռն փոփոխությունների առջեւ Չինաստանն ու Ռուսաստանն ամրապնդել են համագործակցությունը եւ միասին աշխատել կորոնավիրուսի համավարակի դեմ՝ լավ օրինակ լինելով միջազգային համագործակցության համար»,-նշել է նա:
Նրա խոսքով՝ չնայած համավարակը սահմանափակել է մարդկանց շփումը, Համացանցը դարձրել է տեղեկատվությունը հասանելի եւ կարեւոր դեր խաղացել կորոնավիրուսի դեմ պայքարի համաշխարհային ջանքերում:
«Համացանցում արագորեն տարածվում է հսկայական տեղեկատվություն, տվյալներ եւ անգամ ասեկոսեներ, ուստի ԶԼՄ-ները պետք է հանրությանը հաղորդեն հնարավորինս հավաստի ու ճիշտ ժամանակին տեղեկատվություն»,-նշել է Բելլա Չերկեսովան՝ ՌԴ թվային զարգացման, կապի եւ զանգվածային հաղորդակցությունների փոխնախարարը:
China Daily-ի գլխավոր խմբագիր Չժոու Շուչունն իր հերթին նշել է, որ համավարակն ուժգին ազդել է աշխարհի վրա, եւ համաշխարհային տնտեսության վերականգնումը բախվում է լուրջ խնդիրների հետ:
«Չինաստանն ու Ռուսաստանը միասին պայքարել են համավարակի դեմ, պաշտպանել բազմակողմանիության սկզբունքը, կայուն զարգացրել են երկկողմանի առեւտուրը եւ գրանցել նոր առաջընթաց երկկողմանի հարաբերություններում»,-նշել է նա:
Վերջին 11 ամսվա ընթացքում առաջին անգամ Չինաստանի եւ Ռուսաստանի միջեւ ապրանքաշրջանառությունը հասել է 97,39 մլրդ դոլարի, իսկ 2021 թվականին ակնկալվում է, որ այն կգերազանցի 10 մլրդ դոլարը: