Այսօր խնդիր է դրված թույլ չտալու զբոսաշրջային ոլորտի փլուզում, իսկ դրա համար պետք է տուրիզմի զարգացման համալիր ծրագրեր իրականացնել: Այս մասին այսօր լրագրողների հետ զրույցում ասաց Տուրիզմի հայկական ֆեդերացիայի նախագահ Մեխակ Ապրեսյանը:
Նրա խոսքով՝ հյուրանոցների եւ տուրօպերատորների աշխատանքը պարզապես կանգնած է: «Իհարկե, կառավարության աջակցության ծրագրերը ինչ-որ առումով նպաստել են աշխատատեղերը պահպանելուն, սակայն կարեւոր էր դրանք սահմանել՝ հաշվի առնելով ոլորտի առանձնահատկությունը: Վարկի մարման արտոնյալ ժամկետը պետք էր սահմանել ոչ թե 6 ամսով, այլ մեկ տարով: Այժմ այդ վարկերը մարելու համար հնարավորություն չկա: Պետք է քննարկել եւ երկարաձգել վարկերի մարման ժամկետները մինչեւ 2021 թվականի ապրիլ: Բացի այդ, եթե 23-րդ ծրագրով աջակցությունը դադարեցվի, ապա ոլորտը կհայտնվի ծանր վիճակում: Այդ ամենը խոսում է այն մասին, որ ծրագրերի իրականացման դեպքում շատ կարեւոր է հաշվի առնել մասնավոր ոլորտի կարծիքը: Համակարգային օրենսդրական փոփոխությունների շրջանակում անհրաժեշտ է նաեւ սահմանել ընդհանուր տեղեկատվական բազա, որպեսզի հնարավորություն լինի օբյեկտիվորեն վերլուծել շուկան: Անհնար է առանց տուրիզմի ապահովել երկնշանակ տնտեսական աճ, ինչի մասին վերջերս ասել է ՀՀ էկոնոմիկայի նախարարը»,-նշեց նա:
Փորձագետն ընդգծեց մինչեւ 2024 թվականի տուրիզմի զարգացման հայեցակարգի մշակման կարեւորությունը: «Այստեղ պետք է հաշվի առնվեն նաեւ նոր պայմաններում Ղարաբաղի տուրիզմի զարգացման առանձնահատկությունները, տարածաշրջանում տրանսպորտային հաղորդակցությունների ապաարգելափակումը պետք է համապատասխանի մեր տուրիզմի զարգացման շահերին: Բացի այդ, կարեւոր է ակտիվորեն ֆինանսավորել տուրիզմի մարքեթինգը, ինչը մեզ մոտ՝ ի տարբերություն այլ տուրիստական երկրների, տեղի չի ունենում: Շատ կարեւոր է տարածաշրջանում քաղաքական կայունությունը: Այցելության համար անցանկալի պետությունների ցուցակում հայտնվելու ռիսկից խուսափելու համար պետք է աշխարհին հասցնել, որ երկիրն անվտանգ է զբոսաշրջիկների համար»,-եզրափակեց Ապրեսյանը:
