Առանց ներմուծման տուրքերի հնարավոր կլինի գունավոր թանկարժեք քարեր եւ մինչեւ 0,3 կարատանոց մանր ադամանդներ ներմուծել Ռուսաստան, Ղազախստան եւ Եվրասիական տնտեսական միության (ԵԱՏՄ) այլ երկրներ: Այս որոշումը կայացրել է Եվրասիական տնտեսական հանձնաժողովի (ԵԱՏՀ) կոլեգիան: Ներմուծման տուրքերի չեղարկումը կգործի 2 տարի:
«Տուրքերի դրույքաչափերի իջեցումը թույլ կտա կրճատել ոսկերչական ոլորտի ծախսերը եւ բարձրացնել պատրաստի թանկարժեք զարդերի մրցունակությունը ներքին եւ արտաքին շուկաներում»,- հայտարարել է ԵԱՏՀ Առեւտրի կոլեգիայի անդամ (նախարար) Անդրեյ Սլեպնեւը: Այժմ ԵԱՏՄ երկրներում զարդեր պատրաստելու համար քարերի նախապատրաստումը չի բավարարում ներքին պահանջարկը:
Մաքսատուրքերի չեղարկումը կառնչվի մինչեւ 0,3 կարատանոց մանր ադամանդներին եւ բնական կամ արհեստական զմրուխտներին, շափյուղաներին, սուտակներին, նեֆրիտներին, ալեքսանդրիտներին եւ նմանատիպ այլ քարերի, որոնք օգտագործվում են ոսկերչական արդյունաբերության մեջ:
