Հայտնի հայտարարությունն արվել է ոչ միայն Գլխավոր շտաբի ու գեներալների կողմից, այն արել է ամբողջ բանակը: Այս մասին մարտի 1-ին Երեւանի Բաղրամյան պողոտայում կայացած հանրահավաքի ժամանակ ասաց գեներալ-գնդապետ, ՀԱՊԿ նախկին գլխավոր քարտուղար Յուրի Խաչատուրովը:

Նրա խոսքով՝ գնդի հրամանատարը չի կարող միանալ այն հայտարարությանը, որի հետ նրա անձնակազմը համաձայն չէ՝ եթե նա միացել է, նշանակում է նա խոսել է գումարտակի հրամանատարների, վաշտի հրամանատարների հետ, իսկ նրանք խոսել են իրենց զինվորների հետ: «Միայն դրանից հետո է տեղի ունեցել այն, ինչ տեղի է ունեցել: Հենց այնպես ոչինչ չի լինում: Եթե հայտարարում ես, նշանակում է, որ քո թիկունքում ինչ-որ մեկը պետք է լինի: Նրա թիկունքում մեր ամբողջ հայկական բանակն է: Սա արդեն վերջն է, այլեւս տեղ չկա: Մենք անպայման պետք է այս գործը հասցնենք ավարտին եւ շատ արագ:

Էրդողանի ու Ալիեւի մոտ մի տեսակ նյարդայնություն է հայտնվել, նրանք սկսել են հայտարարություններով հանդես գալ, անհանգստացած են: Չգիտես ինչու, միայն նրանց է անհանգստացնում այն, ինչ տեղի է ունենում Հայաստանում: Ինչո՞ւ։ Որովհետեւ հիշում են, որ հայկական բանակը նրանց հարվածել է եւ կհարվածի: Մենք ամեն ինչ անպայման կվերադարձնենք: Ես դիմում եմ իմ բոլոր նախկին ծառայակիցներին, վստահ եղեք, որ ժողովուրդը ձեզ հետ է: Ես իմ դիմաց տեսնում եմ տասը հազարավոր մարդկանց: Նրանք բոլորը ձեզ հետ են, նրանք սիրում են ձեզ եւ նրանք ձեզ չեն լքի»,- ընդգծեց գեներալ-գնդապետը: Յուրի Խաչատուրովն իր խոսքը եզրափակեց քաղաքացիների վանկարկումների ներքո. «Ազգ, բանակ, հաղթանակ»։

Հիշեցնենք, որ փետրվարի 25-ին Հայաստանի Զինված ուժերի Գլխավոր շտաբը հանդես էր եկել հայտարարությամբ՝ պահանջելով վարչապետ Նիկոլ Փաշինյանի ու կառավարության անհապաղ հրաժարականը։