ԱԺ անկախ պատգամավոր Թագուհի Թովմասյանի համար անհասկանալի է, թե ինչից է առաջացել Գլխավոր շտաբի անհամաձայնությունը Կառավարության հետ։ Այս մասին այսօր՝ մարտի 2–ին, ԱԺ–ում լրագրողների հետ զրույցում ասաց պատգամավորը։
«Ենթադրելի էր, որ եթե կար անհամաձայնություն, դա պետք է լիներ առնվազն պատերազմից հետո, կամ որոշակի ժամանակից հետո։ Բայց այս ընթացքում կարծեք թե ամեն ինչ սինխրոնաբար առաջ է գնացել, եւ Օնիկ Գասպարյանը համարվում էր իշխանության ամենավստահելի մարդկանցից մեկը։ Ինչ է հանկարծ պատահել, որ մենք հիմա պահանջում ենք Օնիկ Գասպարյանի հրաժարականը։ Նախ սրա պատճառը պետք է լինի ու նաեւ այն, թե ի՞նչ եղավ, որ Օնիկ Գասպարյանը դուրս եկավ Կառավարության դեմ։ Կան հստակ մեսիջներ, որոնք բացված ու հստակ մեզ հասանելի չեն»,- նշեց Թագուհի Թովմասյանը՝ հավելելով, որ ուղղակի ցանկությունով այսօր ԳՇ պետ փոխելը համարում է վտանգավոր։
«Լինելով սահմանամերձ շրջաններն ընդգրկող մարզի ներկայացուցիչ, ինձ համար շատ կարեւոր է բանակի կայունությունը։ Եթե Օնիկ Գասպարյանը գնում է, ու իր հետեւից գնում են մյուս բարձրաստիճան սպաները, ո՞վ է նրանց փոխարինելու, մեր սահմանների հարցն ինչպե՞ս է լուծվելու։ Այս հերթական արկածախնդրությունը չգիտեմ, թե ինչով կավարտվի»,– նկատեց նա։
Պատգամավորի խոսքով, օրինակ, ժամանակին Արտակ Դավթյանին ԳՇ պետ նշանակելը ճիշտ չէր, քանի որ նա «ապաշնորհ, անպատրաստ զինվորական էր»։
