Այն ժամանակ, երբ ՀՀ-ում ռազմական դրություն հայտարարվեց, դրա հիմքերը չկային: Այս մասին, այսօր՝ մարտի 24-ին, ԱԺ-ում լրագրողների հետ զրույցում նշեց ԱԺ պատգամավոր Գեւորգ Պետրոսյանը:
«Հիմա, երբ Հայաստանի գլխին պատերազմի վտանգ է կախված, վերացնում են ռազմական դրությունը: Դրա համար էլ ես դեմ քվեարկեցի: Թե չէ այստեղ տարբերվելու, անհարկի հակադրվելու խնդիր չկար: Ես այդպիսի հավակնություններ չունեմ»,-ասաց նա:
Հարցին, թե ո՞նց ռազմական դրություն հայտարարելու վտանգ չկար, երբ պտերազմ էր սկսվել, Գեւորգ Պետրոսյանը նկատեց, որ Հայաստանի սահմաններին վտանգ չէր սպառնում. «Պատերազմն Արցախում էր, բբայց «Ռազմական դրության մասին» օրենքում հստակ նշվում է ՀՀ սահմանների անվտանգության մասին: Հիմա, երբ թուրքն ամեն օր մի գյուղ է վերցնում, Հայաստանի սահմանի վրա է գրոհում, պատերազմի վտանգը շատ տեսանելի է, ես գտնում եմ, որ պետք չի ռազմական դրությունը վերացնել: Հակառակը, պետք է ամեն ինչ անել սահմանների անձեռնմխելիությունն առավել բարձր մակարդակի հասցնելու համար»:
Դիտարկմանը, ո եթե ռազմական դրությունը չհանվեր, ընտրություններ չէին կարող կազմակերպել, նա արձագանքեց. «Հենց դա է, այս իշխանության համար կարեւորը վերընտրվելն է, ոչ թե սահմանների անձեռնմխելիությունը»:
Պատգամավորը խոստովանեց, որ առաջ դեմ էր ռազմական դրությանը, քանի որ հիմքերը չկար, հիմա էլ դեմ է ռազմական դրությունը հանելուն, որովհետեւ պատերազմի վտանգը ակնհայտ է:
Լրագրողները հիշեցրին, որ ինքը նոյեմբերի 9-ի հրադադարից հետո եւս հայտարաում էր, որ պետք է ռազմական դրությունը վերացվի, Գեւորգ Պետրոսյանն ասաց, որ չի հիշում, թե այդ ժամանակ նման ելույթ ունեցած լինի: «Եթե մեր սահմաններին վտանգ է սպառնում, պետք է մեր ուշադրությունը սեւեռվի դրա վրա, ոչ թե ասեն՝ բա ընտրություն ոնց անենք: Ջհանդամը, թե ընտրություն չի լինելու: Ինձ անձամբ շատ քիչ է հետաքրքրում ընտրությունը»,-ասաց նա:
