Հայաստանի արտգործնախարարությունը բազմիցս հայտարարել է, որ մշակութային ժառանգության պաշտպանությունը խաղաղ կարգավորման մաս է կազմում: Այս մասին Երեւանում Ռուսաստանի արտգործնախարար Սերգեյ Լավրովի հետ համատեղ մամուլի ասուլիսին հայտարարեց ՀՀ արտաքին գործերի նախարարի պաշտոնակատար ր Արա Այվազյանը:
Այվազյանը հիշեցրեց, որ ԵԱՀԿ Մինսկի խմբի համանախագահներն ապրիլի 13-ի իրենց հայտարարության մեջ անդրադարձել են նաեւ այս խնդրին: «Մենք սերտորեն համագործակցում ենք ՅՈՒՆԵՍԿՕ-ի հետ, սպասում ենք գնահատման առաքելության տարածաշրջանային այցին եւ հուսով ենք, որ ՅՈՒՆԵՍԿՕ-ն ջանք կգործադրի դա անելու համար: Մշակութային ժառանգության պաշտպանությունն անմիջականորեն վերաբերում է մարդու իրավունքներին»,- ասաց Այվազյանը` հավելելով, որ ՄԱԿ-ի հատուկ զեկուցողները փետրվարի սկզբին Ադրբեջանին կոչ են արել հետաքննել Շուշիի Ղազանչեցոց տաճարի գնդակոծումը 2020 թվականի հոկտեմբերի 8-ին եւ ապահովել Հայ առաքելական եկեղեցու ներկայացուցիչների մասնակցությունը տաճարի վերականգնման գործում:
«Մենք տեսնում ենք, որ Ադրբեջանը չլսեց ՄԱԿ-ի կոչերը եւ, ավելին, միակողմանի կոպիտ միջամտությամբ արհամարանք է ցուցադրում: Շուշիի Ղազանչեցոց տաճարն ամենամեծ հայկական եկեղեցիներից մեկն է եւ պետք է կրոնական երկրպագության վայր մնա»,- շեշտեց Արա Այվազյանը: