Գազայի հատվածը վերահսկող «ՀԱՄԱՍ» շարժումը Հորդանան գետի արեւմտյան ափին բնակվող պաղեստինցիներին կոչ է արել շարունակել առճակատումըն Իսրայելի իրավապահ մարմինների ներկայացուցիչների հետ, հաղորդում է ՏԱՍՍ-ը՝ վկայակոչելով պաղեստինյան Saut Al-Aksa-ն:
«Մենք մեր պաղեստինյան ժողովրդին կոչ ենք անում Արեւմտյան ափի բոլոր քաղաքներում շարունակել առճակատումն օկուպանտների հետ, որպեսզի նրանք գին վճարեն մեր սրբավայրերի եւ մեր ժողովրդի դեմ իրենց ագրեսիայի համար»,- ռադիոկայանը մեջբերում է «ՀԱՄԱՍ»-ի պաշտոնական ներկայացուցիչ Հազեմ Քասեմի խոսքերը:
Ավելի վաղ Saut Al-Aksa-ն, վկայակոչելով Պաղեստինի Կարմիր մահիկի ներկայացուցչին, տեղեկացրել էր, որ ավելի քան 200 պաղեստինցի էր վիրավորվել Իսրայելի հետ Հորդանան գետի արեւմտյան ափի շփման գծերում իսրայելական ոստիկանության հետ բախումների արդյունքում: Ամենադաժան բախումները տեղի են ունեցել Հեւրոն նահանգի Ալ-Հալիլ քաղաքում, որտեղ 13 պաղեստինցի է վիրավորվել իսրայելական անվտանգության ուժերի կողմից արցունքաբեր գազի ու ռետինե փամփուշտների կիրառման արդյունքում:
