Մայիսի 3-ին ոստիկանության Նոր Նորքի բաժին հաղորդում էր ստացվել, որ Ավանում բնակարանային գողություն են արել:
Ոստիկանությունից NEWS.am-ին հայտնում են, որ Ավանի Աճառյան փողոցի բնակիչը հայտնել էր, որ տնից գողացել են ոսկյա զարդեր և մետաղադրամներ: Մեկնած օպերատիվ խումբը ճշտել էր, որ գողությունը կատարվել էր ժամը 19.30-ից 20.00-ն ընկած ժամանակահատվածում, դուռն էլ բացել էին հարմարեցված բանալիով:
Ավանի բաժանմունքի քրեական հետախույզների ձեռնարկած օպերատիվ-հետախուզական միջոցառումների շնորհիվ օպերատիվ տեղեկություն ստացվեց, որն իրացվեց ոստիկանության Նոր Նորքի բաժնի աշխատակիցների հետ: Գողությունը կատարելու կասկածանքով Ավանի Հովհաննիսյան թաղամասից բերման ենթարկվեց և ձերբակալվեց Ավանի բնակիչ, նախկինում բնակարանային գողության համար դատապարտված, 39-ամյա մի տղամարդ:
Սրանով, սակայն, միջոցառումները չավարտվեցին: Հարուցված քրեական գործի շրջանակներում իրականացված օպերատիվ-հետախուզական և քննչական գործողությունների արդյունքում պարզվեց 39-ամյա տղամարդու ևս մեկ հանցարարք: Ապրիլի 22-ին, դարձյալ աշխատանքային ժամերին, տեխնիկական միջոցների գործադրմամբ բացել էր Թոթովենցի փողոցի մի տան մուտքի դուռը և գողացել փող ու ոսկեղեն:
Երկու դեպքով էլ ձեռնարկվում են միջոցառումներ՝ գողոնը հայտնաբերելու ուղղությամբ:
Կատարվում է նախաքննություն:
