Եթե դու ինքդ ոչինչ չես անում, ապա ի՞նչ հարցով ես դիմում ՀԱՊԿ-ին: Այս մասին, այսօր՝ մայիսի 25-ին, «Հայաստան» դաշինքի ղեկավարների ասուլիսի ժամանակ նշեց ՀՀ երկրորդ նախագահ Ռոբերտ Քոչարյանը՝ անդրադառնալով հարցին, թե արդյոք ճի՞շտ էր Սյունիքում ստեղծված իրավիճակի հարցով դիմել ՀԱՊԿ-ին եւ արդյոք ճիշտ հոդվածով ենք դիմել:
«Դա մի քիչ նման է նրան, որ փողոցում մի քիչ մեծ տղան փոքր երեխային ապտակում է, նա էլ վազելով գնում է պապայի մոտ, ասում է՝ պապա, մի բան արա, ինձ նեղում են: Ի վերջո, մենք պետությու՞ն ենք, թե՝ ոչ, արժանապատվություն, ինքնասիրություն ունե՞նք, թե ոչ: Եթե դու ինքդ ոչինչ չես անում, չես ձեռնարկում ու մտածում ես, որ քո տեղը ուրիշը գալու է այս հարցը լուծի՞: Ուղղակի մենք աբսուրդի ժանրից ենք հիմա խոսում: Ես համոզված եմ, որ ՀԱՊԿ-ի պատմության մեջ նման դրսեւորումներ չեն եղել: Եթե դու ոչինչ չես անում քո հարցերը լուծելու համար, քեզ ոչ մեկը չի օգնելու այդ հարցերի լուծմանը: Սա շատ ակնհայտ բանաձեւ է»,- ասաց Ռոբերտ Քոչարյանը:
Հիշեցնենք, որ մայիսի 13-ին վարչապետի պաշտոնակատար Նիկոլ Փաշինյանը հրավիրել է Անվտանգության խորհրդի նիստ եւ հայտարարել, որ Հայաստանի Հանրապետությունը պաշտոնապես դիմում է ՀԱՊԿ-ին պայմանագրի 2-րդ հոդվածով:
