Մեծ տերությունների հարաբերությունները, ինչպես երբեւէ, ապակազմակերպված են, եւ դա արտացոլվում է աշխարհում տիրող իրավիճակի վրա: Այսպիսի կարծիք է չորեքշաբթի օրը ֆրանսիական Le Monde թերթին տված հարցազրույցում հայտնել ՄԱԿ գլխավոր քարտուղար Անտոնիո Գուտերեշը:
«Պետք է գիտակցել, որ մեծ տերությունների միջեւ հարաբերություններն ավելի դիսֆունկցիոնալ են, քան երբեւէ: Մենք դա տեսնում ենք նրանում, որ ՄԱԿ Անվտանգության խորհուրդը կաթվածահար է լինում, երբ բանը վերաբերում է հիմնական հարցերին»,- ասել է նա:
Գլխավոր քարտուղարի խոսքով՝ «սա միջին տերություններին մանեւրի ավելի լայն տեղ է տալիս»: «Արդյունքում՝ հակամարտությունների մեծ մասը, որոնք տեղական բնույթ էին կրում, ստացել են միջազգային մասշտաբներ»,- ասել է նա: «Նայեք Լիբիային, Սիրիային, Եմենին: Երբեմն այդ միջին տերություններն ավելի մեծ ազդեցություն ունեն, քան մեծ տերությունները»,- ասել է Գուտերեշը: Դա, նրա կարծիքով, «անպատժելիության զգացում է ստեղծում»:
Միեւնույն ժամանակ, ՄԱԿ գլխավոր քարտուղարն ընդգծել է, որ «վերջին ամիսներին նոր հակամարտություններ են ի հայտ եկել, ինչպիսիք են իրավիճակը Լեռնային Ղարաբաղում կամ Եթովպիայի եւ Սուդանի միջեւ առճակատման վտանգը»: «Արդյունքում, հակամարտությունների կանխումը եւ լուծումը դարձել է ավելի բարդ: Միջազգային մարդասիրական իրավունքի կամ մարդու իրավունքների խախտումների դեպքերը հաճախակիացել են»,- ասել է նա:
Գուտերեշի խոսքով՝ «հակամարտության ու ահաբեկչության միջեւ կապը ավելի է սերտացել»: «Լավ օրինակ է Սահելի գոտին [Աֆրիկայում]: Բայց մենք դրան հակազդելու մեխանիզմներ չունենք»,- խոստովանել է նա: