Երեւանի ընդհանուր իրավասության դատարանում այսօր՝ հուլիսի 12-ին, քննվում է Մեղրիի արդեն նախկին քաղաքապետ Մխիթար Զաքարյանին կալանավորելու վերաբերյալ միջնորդությունը։
Նրա պաշտպան Երեմ Սարգսյանը լրագրողների հետ զրույցում նշեց, որ այս պահին դատարանում քննվելու է նաեւ Զաքարյանին ձերբակալելու իրավաչափության հարցը։
Նշենք, որ խուլիգանության հոդվածով արդեն մեղադրվող Զաքարյանին նոր մեղադրանք է առաջադրվել երկու հոդվածով՝ պաշտոնական լիազորությունները չարաշահելը եւ պաշտոնական փաստաթղթերում կեղծ տեղեկություններ ներառելը։
Ըստ մեղադրանքի՝ նա թաքցրել է այլ պետության քաղաքացիություն ունենալու փաստը։
Զաքարյանին իրավապահները բերման են ենթարկել շոու ծրագրով. երեկ կեսգիշերին, երբ նա Երեւան է եկել՝ քրեական ոստիկանության գլխավոր վարչության շենք, որպեսզի ներկայանա քննիչին, շենքի մոտ դիմակավորված, ինքնաձիգերով անձիք նրան պառկեցրել են ասֆալտին, տեսանկարահանել, նոր միայն բերման ենթարկել։
Այս մանրամասները պատմել է նրա փաստաբան Երեմ Սարգսյանը, որին իրավապահները պարզաբանել են, թե իբր Զաքարյանին մինչեւ այդ փորձել են քննչական մարմնին ներկայանալու ծանուցագրեր փոխանցել, սակայն չի հաջողվել, քանի որ տանը մարդ չի եղել։ Մինչդեռ փաստաբանի խոսքով՝ տանը միշտ մարդ եղել է, իրենք գլխավոր վարչություն են եկել բարձրաստիճան ոստիկանի հետ ձեռք բերած պայմանավորվածության հիման վրա եւ իրավապահներն էլ իմացել են, որ իրենք դրսում սպասում են։
