Վերջին 2 ամիսներին հայ-ադրբեջանական սահմանին 2 զոհ ենք ունեցել: Այս մասին, այսօր՝ հուլիսի 15-ին, կառավարության նիստում հայտարարեց վարչապետի պաշտոնակատար Նիկոլ Փաշինյանը:
«Ցավակցություն հայտնելով զոհերի հարազատներին ու մերջավորներին, ՀԱՊԿ-ի մեր գործընկերների, ԵԱՀԿ Մինսկի խմբի համանախագահության ուշադրությունն եմ հրավիրում այս փաստի վրա:
Տարածաշրջանային կայունության եւ փոխվստահության հաստատմանը խոչընդոտող հաջորդ կարեւոր գործոնը այն փաստն է, որ ի հեճուկս իր ստանձնած պարտավորությունների, Ադրբեջանը մինչ օրս չի վերադարձրել մեր ռազմագերիներին: Ամեն դեպքում միջազգային մեր գործընկերների հետ համագործակցությամբ մինչ օրս մենք կարողացել ենք վերադարձնել 104 ռազմագերիների: Մենք շարունակելու ենք աշխատել բոլոր ռազմագերիների վերադարձի ուղղությամբ, Ղարաբաղի հարցի համապարփակ կարգավորման, սահմանների սահմանազատման եւ սահմանագծման աշխատանքները, տարածաշրջանային կոմունիկացիաների բացումը եղել են, կան եւ լինելու են մեր առաջնահերթությունների շարքում»,-ասաց նա:
Փաշինյանը հավելեց, որ Ադրբեջանն այս ապակառուցողական գործողություններով ոչ միայն խախտում է նոյեմբերի 9-ի հայտարարությունը, այլեւ փորձում է խաթարել հունվարի 11-ի հայտարարությամբ ամրագրված տարածաշրջանային ենթակառուցվածքների ապաշրջափակման գործընթացի, ինչպես նաեւ ԵԱՀԿ Մինսկի խմբի համանախագահների ապրիլի 13-ի հյտարարությամբ նախատեսված խաղաղ բանակցությունները եւ տարածաշրջանային կայունությունն ընդհանրապես:
«Ադրբեջանի նման գործողությունները մարտահրավեր են միջագային իրավունքին եւ բոլոր այն ուժերին, որոնք շահագրգռված են տարածաշրջանային խաղաղության ու կայունության հաստատմամբ: Մենք շաևրունակելու ենք մեևր համագործակցությունը այդ ուժերի հետ»,-ասաց վարչապետի պաշտոնակատարը:
