Հայաստանում մի ինչ-որ աղավաղված իրավիճակ է ստեղծվել։ Շատ մարդիկ «նստած» են նպաստների վրա՝ շարունակելով մնալ աղքատ եւ չզբաղվելով որեւէ աշխատանքի որոնմամբ։ Այս մասին կառավարության նիստից հետո լրագրողների հետ զրույցում հուլիսի 22-ին ասաց հանրապետության էկոնոմիկայի նախարարի պաշտոնակատար Վահան Քերոբյանը։
Նա, մասնավորապես, առաջարկեց այդ մարդկանց փոխել իրենց մենթալիտետը, հրաժարվել նպաստներից եւ անցնել նորմալ տնտեսական գործունեության ոլորտ։ «Գյուղերում անգամ հովիվները չեն հերիքում։ Նրանց գտնել չեն կարողանում։ Ստիպված ենք գնալ ու հովիվներ բերել տարբեր երկրներից։ Կարող եմ էլի մեկ օրինակ բերել։ Սեւանն ունի ցեղական ոչխարաբուծական ֆերմա։ Նրանք ամիսը 200 հազար դրամով հովիվ են փնտրում։ Նրանք փորձում են գտնել մարդկանց Տաջիկստանից կամ այլ երկրներից, որոնք կհամաձայնեն իրենց մոտ աշխատել։ Սպիտակում ագրոհոլդինգ կա, որտեղ հնդիկներ են աշխատում։ Եվ ես կարող եմ բազմաթիվ նման օրինակներ բերել, որովհետեւ մեր գյուղական բնակիչները չեն ցանկանում աշխատել»,- պարզաբանել է նախարարի պաշտոնակատարը՝ դժգոհելով կառավարող կուսակցության ընտրազանգվածի պահվածքից։
Հիշեցնենք, որ «Քաղաքացիական պայմանագիր» կուսակցությունն իր ձայների մեծ մասը ստացել է գյուղական վայրերից։
