News
Լրահոս
News
Չորեքշաբթի
Սեպտեմբեր 22
Տեսնել լրահոսը

ՀՀ Քննչական կոմիտեի Տավուշի մարզային քննչական վարչությունում ավարտվել է շորթման դեպքի առթիվ հարուցված քրեական գործի նախաքննությունը: Մինչդատական վարույթում իրականացված քննչական եւ այլ դատավարական գործողությունների արդյունքում պարզվել են դեպքի՝ էական նշանակություն ունեցող հանգամանքներ:  Այս մասին NEWS.am-ը տեղեկանում է ՀՀ քննչական կոմիտեի տեղեկատվության եւ հասարակայնության հետ կապերի բաժնից։

Քննությամբ հիմնավորվել է, որ երեւանաբնակ տղամարդը, տիրապետելով Իջեւանի բնակչի վերաբերյալ անձնական բնույթի տեղեկատվությանը, շորթման եղանակով գումար հափշտակելու դիտավորությամբ, վերջինիցս պահանջել է խոշոր չափերի՝ 600.000 ՀՀ դրամ գումար, սպառնացել բռնություն գործադրել նրա մերձավորների նկատմամբ, իսկ աշխատավայրում եւ բնակության վայրում՝ տարածել արատավորող տեղեկություններ:

Տղամարդը, սպառնալիքներն իրականացնելու իրական վտանգ զգալով, 2020թ. դեկտեմբերի սկզբին Երեւանի բնակչին փոխանցել է պահանջված գումարը:

Չբավարարվելով ստացածով՝ Երեւանի բնակիչը, խոշոր չափերի գույքի՝ շորթման եղանակով հափշտակելու շուրջ նախնական համաձայնության գալով իր ծանոթների՝ Տավուշի մարզի երկու բնակիչների հետ, 2020թ. դեկտեմբերին պահանջել է խոշոր չափերի՝ այս անգամ 1.500.000 ՀՀ դրամ գումար: Վերջիններս կացնով սպառնացել են տղամարդուն՝ հրաժարվելու դեպքում նախ կտրել նրա ձեռքի մատները, բռնություն գործադրել նրա մերձավորների նկատմամբ, ապա՝ աշխատավայրում տարածել արատավորող տեղեկություններ:

Ի հաստատումն հնչեցված սպառնալիքներն իրականացնելու վճռականության՝ նշված անձանցից մեկը ծեծի է ենթարկել նրան՝ պահանջելով համաձայնել ներկայացված պահանջներին, իսկ մյուսը խոչընդոտել է վերջինիս փախուստը՝ առաջարկելով թղթախաղի միջոցով լուծել հարցը. տղամարդը, բռնության ու սպառնալիքների իրական վտանգն զգալով, համաձայնել է տալ պահանջվող գումարը եւ 2020թ. դեկտեմբերի 31-ին վճարային տերմինալով Երեւանի բնակչին փոխանցել 100.000 ՀՀ դրամ գումար:

Հասկանալով, որ անելանելի վիճակում է, Իջեւանի բնակիչը դիմել է իրավապահներին եւ 2021թ. հունվարի 21-ին՝ ՀՀ ոստիկանության քրեական ոստիկանության ծառայողների կողմից մշակված 500.000 ՀՀ դրամ գումարը կանխիկ տալու պահին, Երեւանի բնակիչը ձերբակալվել է։

Հարուցված քրեական գործի քննությամբ պարզվել է նաեւ, որ վերջինս ապօրինի կերպով ձեռք է բերել, պահել եւ կրել է 5.6մմ տրամաչափի, հրազեն հանդիսացող, արհեստագործական եղանակով պատրաստված ատրճանակ, ինչպես նաեւ՝ ակոսափող զենքերից կրակելու համար նախատեսված, 5.6մմ տրամաչափի, ռազմամթերք հանդիսացող երկու փամփուշտ, որոնք հայտնաբերվել են նրա անձնական խուզարկությամբ։

Ձեռք բերված բավարար ապացույցների համակցությամբ Երեւանի բնակչին մեղադրանք է առաջադրվել ՀՀ քրեական օրենսգրքի 182-րդ հոդվածի 2-րդ մասի 2-րդ կետով (2 դրվագ), 3.1-րդ կետով եւ 235-րդ հոդվածի 1-ին մասով, իսկ Տավուշի մարզի երկու բնակիչներին՝ ՀՀ քրեական օրենսգրքի 182-րդ հոդվածի 2-րդ մասի 2-րդ եւ 3.1-րդ կետերով: Նրանց նկատմամբ որպես խափանման միջոց ընտրվել է ստորագրություն՝ չհեռանալու մասին:

Նախաքննությունն ավարտվել է, եւ քրեական գործը, մեղադրական եզրակացությամբ, ուղարկվել է դատարան:

Տպել
Ամենաշատ