Մեծ Բրիտանիան պատժամիջոցներ է սահմանել բելառուսական կալիումական պարարտանյութերի եւ նավթամթերքների արտահանման նկատմամբ՝ նախագահ Լուկաշենկոյի վրա ճնշում գործադրելու նպատակով:
«Այս պատժամիջոցները ցույց են տալիս, որ ընտրակեղծիքներից հետո Մեծ Բրիտանիան չի ընդունի Լուկաշենկոյի գործողությունները», - ասել է արտգործնախարար Դոմինիկ Ռաաբը: «Լուկաշենկոյի ռեժիմը շարունակում է ոչնչացնել ժողովրդավարությունը եւ ոտնահարել մարդու իրավունքները Բելառուսում: Նրա արդյունաբերության արտադրանքը չի վաճառվի Մեծ Բրիտանիայում»: Մինչ այժմ արեւմտյան պատժամիջոցները չեն համոզել 1994 թվականից ի վեր նախկին խորհրդային պետության իշխանության ղեկին գտնվող Լուկաշենկոյին փոխել իր քաղաքական գիծը:
«Այս միջոցառումները լրացուցիչ լուրջ քայլ են Լուկաշենկոյի ռեժիմի վրա ճնշում գործադրելու համար», - հայտարարել է Մեծ Բրիտանիայի ԱԳՆ-ն: «Դրանք ուղղված են Լուկաշենկոյի, նրան շրջապատողների եւ պետական հաստատությունների վրա ճնշում գործադրելուն՝ վարքագիծը փոխելու եւ Բելառուսի բնակչության լայն շերտերի համար անցանկալի հետեւանքները նվազագույնի հասցնելու համար»:
