ՄԱԿ գլխավոր քարտուղար Անտոնիո Գուտերեշը «Աֆղանստանում գլոբալ ահաբեկչական սպառնալիքի կասեցման» համատեղ աշխատանքի կոչ է արել աշխարհին այն բանից հետո, երբ թալիբները իրենց վերահսկողության տակ են առել պատերազմից բզկտված երկիրը:
«Միջազգային հանրությունը պետք է միավորվի, որպեսզի համոզվի, որ Աֆղանստանը այլեւս երբեք չի օգտագործվի որպես ահաբեկչական կազմակերպությունների հարթակ կամ ապաստան»,- ասել է Գուտերեշը՝ Աֆղանստանի հարցով ՄԱԿ Անվտանգության խորհրդի արտահերթ նիստում:
«Ես կոչ եմ անում Անվտանգության խորհրդին եւ միջազգային հանրությանը` միավորվել, աշխատել միասին եւ գործել միասնաբար»,- հավելել է Գուտերեշը: Նա երկրներին կոչ է արել «օգտագործել իրենց տրամադրության տակ եղած բոլոր գործիքները՝ Աֆղանստանում գլոբալ ահաբեկչական սպառնալիքը ճնշելու եւ մարդու հիմնական իրավունքների պահպանումը երաշխավորելու համար»:
Գուտերեշն ասել է, որ աֆղանստանցիները «արժանի են մեր լիակատար աջակցությանը»: «Հաջորդ օրերը որոշիչ կլինեն»,- նշել է նա: «Աշխարհը նայում է: Մենք չենք կարող եւ չպետք է լքենք Աֆղանստանի ժողովրդին»: Նրա խոսքով «ծայրահեղ կարեւոր է պաշտպանել աֆղանցի կանանց եւ աղջիկների դժվարությամբ ձեռք բերված իրավունքները»: Գուտերեշը նաեւ կոչ է արել թալիբներին «հարգել եւ պաշտպանել միջազգային հումանիտար իրավունքը եւ բոլոր մարդկանց իրավունքներն ու ազատությունները»: