Մինչեւ 2024 թվականը Լուսնի վրա մարդկանց վայրէջք իրականացնելու ՆԱՍԱ-ի ծրագրերը գործնականում անիրատեսական են, գրել է Axios-ը:
Քանի որ Միջազգային տիեզերական կայանը հնանում է, աշխարհաքաղաքական ուշադրությունը գնալով կենտրոնանալու է Լուսնի վրա, իսկ ԱՄՆ-ը, Չինաստանը, Ռուսաստանը եւ այլ երկրներ մասնակցելու են մարդկանց Լուսին հասցնելու տարբեր ծրագրերին:
Թրամփի վարչակազմը Լուսնի վրա վայրէջքի վերջնաժամկետը 2028 թվականից տեղափոխել է 2024 թվականին, որպեսզի դա տեղի ունենա մինչեւ իր պաշտոնավարման երկրորդ ժամկետի ավարտը: Բայդենի վարչակազմը պահպանել է այս վերջնաժամկետը, սակայն փորձագետների կարծիքով՝ այն իրատեսական է: «Ես չգիտեմ որեւէ մեկին, ով իսկապես հավատում է այս ժամկետին», - ասել է Վիկտորիա Սամսոնը «Անվտանգ աշխարհ» հիմնադրամից: «Բոլորը հասկանում էին, որ այն ուղղված էր ոչ թե ծրագրային, այլ քաղաքական նպատակին հասնելուն»:
ՆԱՍԱ-ի Գլխավոր տեսուչի գրասենյակը անցյալ շաբաթ հայտարարել է, որ դեպի Լուսին առաքելության համար նախատեսված սկաֆանդրները պատրաստ կլինեն «ամենաշուտը 2025 թվականի ապրիլին»: ՆԱՍԱ-ի Space Launch System հրթիռը եւ Orion կապսուլան, որոնք անհրաժեշտ են վայրէջքի համար, նույնպես հետ են մնում ժամանակացույցից: «Տեխնիկապես ոչ մի կերպ հնարավոր չէ նպատակին հասնել մինչեւ 2024 թվականը: Այնպես որ, այո, սկաֆանդրի մասին զեկույցը վերջին կաթիլն է, սակայն դրանից բացի շատ անպատրաստ բաներ կան», - ասել է Ջորջ Վաշինգտոն համալսարանի Տիեզերական քաղաքականության ինստիտուտի հիմնադիր Ջոն Լոգսդոնը:
Նույնիսկ Թրամփի վարչակազմի օրոք Artemis ծրագիրը բավականաչափ ֆինանսավորվում չի ունեցել: Վերջնաժամկետը հասարակության ու Կոնգրեսի մոտ անիրատեսական ակնկալիքներ առաջացրեց եւ ստիպեց ինժեներներին տեղավորվել անիրատեսական ժամկետներում: «Իրականացնելու համար շատ հավակնոտ վերջնաժամկետ ունենք` համեստ ֆինանսավորման հետ մեկտեղ: Դա գրեթե անհնար է», - ասել է Քեյսի Դրեյերը «Մոլորակային հասարակությունից»: «Սա արդարացի չէ ՆԱՍԱ-ի հանդեպ: Սա արդարացի չէ հասարակության հանդեպ... Եթե ցանկանում էինք տեղավորվել այս ժամկետներում, Կոնգրեսը պետք է գումար հատկացներ, եւ, անկեղծ ասած, [Թրամփի] վարչակազմը պետք է շատ ավելին պահանջեր»:
Հավակնոտ վերջնաժամկետը կարող է նաեւ դրդել այնպիսի մրցակիցների, ինչպիսիք են Ռուսաստանը կամ Չինաստանը, սահմանել ավելի հավակնոտ ժամկետներ՝ մեծացնելով մրցակցությունը, ասել է Սամսոնը: ՆԱՍԱ-ն դեռ պետք է ճշգրտի Artemis-ի ժամանակացույցը, սակայն փորձագետները ակնկալում են, որ վայրէջքը հետաձգվելու է մի քանի տարով: