ՄԱԿ-ը հայտարարել է, որ իր մարդասիրական ավիացիոն ծառայությունը վերսկսում է օդային գործողությունները Աֆղանստանում, որպեսզի 160 մարդասիրական կազմակերպություններ կարողանան շարունակել գործունեությունը երկրի նահանգներում, հաղորդել է AP-ն:
ՄԱԿ-ի խոսնակ Ստեֆան Դյուժարիկը հայտնել է, որ ծառայությունը Պակիստանի մայրաքաղաք Իսլամաբադը կապում է հյուսիսում Մազարի Շարիֆի եւ հարավ-արեւելքում` Քանդահարի հետ: Նա նշել է, որ բեռնատար օդային կամուրջ է կառուցվում՝ ոչ պարենային ապրանքների, ինչպիսիք են բժշկական եւ առաջին անհրաժեշտության այլ պարագաների տեղափոխման համար:
Նրա խոսքով՝ ավիաուղու ներքին ուղեւորափոխադրումների համար անհրաժեշտ է 18 մլն դոլար, իսկ բեռնատար օդային կամրջի աշխատանքը շարունակելու համար` 12 մլն դոլար:
«2002 թվականից մինչեւ 2021 թվականը Աֆղանստանում ՄԱԿ-ի մարդասիրական օդային ծառայությունը սպասարկել է երկրի ավելի քան 20 ուղղություններ», - ասել է Դյուժարիկը: «Այն կձգտի վերադառնալ այս վայրեր, հենց որ անվտանգությունն ու ֆինանսավորումը թույլ տան»: