Ջեյմս Ուեբի տիեզերական աստղադիտակը, որը, ինչպես հուսով են աստղագետները, բացահայտումների նոր դարաշրջանի սկիզբ կդնի, կգործարկվի դեկտեմբերի 18-ին, հաղորդում է NASA-ն, փոխանցում է AFP-ն:
10 միլիարդ դոլար արժողությամբ աստղադիտարանը, որը NASA-ի, Եվրոպական տիեզերական գործակալության եւ Կանադայի տիեզերական գործակալության համատեղ նախագիծն է, կարձակվի Ariane 5 հրթիռի վրա` Ֆրանսիական Գվիանայի տիեզերակայանից:
Ներկայումս այն պահվում է Ռեդոնդո-բիչում (Կալիֆոռնիա) Northrop Grumman կապալառուի օբյեկտներում:
Հետազոտողները ցանկանում են օգտագործել տիեզերական աստղադիտակը, որը երբեւէ ստեղծված ամենամեծն ու ամենահզորն է, որպեսզի տեսնեն առաջին աստղերն ու գալակտիկաները, որոնք ձեւավորվել են Մեծ պայթյունից մի քանի հարյուր միլիոն տարի անց:
Հիմնական առանձնահատկությունը ինֆրակարմիր ճառագայթումը հայտնաբերելու ունակությունն է, քանի որ մինչ այն ժամանակը, երբ առաջին օբյեկտների լույսը հասնում է մեր աստղադիտակներին, այն տիեզերքի ընդլայնման արդյունքում տեղափոխվում է դեպի էլեկտրամագնիսական սպեկտրի կարմիր ծայրը: Ներկայիս «Հաբլ» տիեզերական աստղադիտակն ունի ինֆրակարմիր ճառագայթման սահմանափակ թողունակություն: Աստղագետները նաեւ հույս ունեն, որ Ջեյմս Ուեբի աստղադիտակը կարագացնի այլմոլորակային աշխարհների հայտնաբերումը:
