Չինաստանի արտաքին գործերի նախարար Վան Ին հայտարարել է, որ Չինաստանը պատրաստ է համագործակցել Սինգապուրի հետ դեղամիջոցների հետազոտման եւ ստեղծման, ինչպես նաեւ վիրուսների ուսումնասիրման հարցում, ասվում է Չինաստանի ԱԳՆ պաշտոնական կայքում։
«Չինաստանը պատրաստ է համագործակցություն ծավալել սինգապուրյան կողմի հետ դեղամիջոցների հետազոտման եւ ստեղծման, վիրուսների եւ այլ ուղղությունների ուսումնասիրման հարցում, ինչպես նաեւ միասին դիմակայել «պատվաստանյութային նացիոնալիզմին», որպեսզի սեփական ավանդը ներդնի տարածաշրջանում համավարակի դեմ պայքարում»,- նշել է Վան Ին։
Սինգապուրցի պաշտոնակցի՝ Վիվիան Բալաքրիշնանի հետ հանդիպման ընթացքում նախարարը նաեւ ասել է, որ «վիրուսը տարբերություն չի դնում ազգային սահմանների եւ ցեղերի միջեւ, միայն ողջ մարդկության համախմբվածությունը կարող է վերջնականապես հաղթել համավարակը»։ Նա նշել է, որ վիրուսի ծագման հարցի քաղաքականացումը, պատասխանատվությունն այս կամ այն կողմի վրա դնելը եւ «սլաքների տեղափոխումը» վնաս են հասցնում միջազգային հակահամաճարակային համագործակցությանը։
