Սյունիքի մարզի Տաթեւ խոշորացված համայնքում հոկտեմբերի 17-ին կայացած ՏԻՄ ընտրությունների ձայների վերահաշվարկը քիչ առաջ ավարտվեց։ Ընտրություններին մասնակցած երեք ուժերից՝ «Քաղաքացիական պայմանագիր» կուսակցությանը տրված ձայների քանակն այսօրվա վերահաշվարկի արդյունքով՝ ավելացել է մեկով և պակասել է կրկին մեկով, «Շանթ դաշինք»-ին եւ «Ապրելու երկիր»-ին տրված ձայների քանակը պակասել է մեկական ձայներով։ Այս մասին այսօր՝ հոկտեմբերի 20–ին, լրագրողների հետ զրույցում ասաց թիվ 34 տարածքային ընտրական հանձնաժողովի նախագահ Սլավիկ Դադաշյանը։
Նշենք՝ նախօրեին, Շինուհայրի 34/19 տեղամասի ձայների վերահաշվարկի արդյունքում «Քաղաքացիական պայմանագիր» կուսակցությանը տրված ձայների քանակն ավելացել էր 9-ով, «Շանթ Դաշինք»-ինը՝ 4-ով, «Ապրելու երկիր»-ինը՝ 1-ով:
ԿԸՀ–ն ՏԻՄ ընտրությունների արդյունքներն ամփոփելու է քվեարկությունից 7 օր հետո՝ հոկտեմբերի 24–ին։
«Վերջնական արձանագրություններով, կուսակցություններին տրված ձայների հաշվարկով, մենք կկատարենք մանդատների բաշխում։ Այսօր վաղ է մանդատների բաշխման վերաբերյալ խոսել»,– ասաց Սլավիկ Դադաշյանը։
Հիշեցնենք՝ Տաթեւ խոշորացված համայնքում վերահաշվարկ պետք է տեղի ունենար 7 ընտրատեղամասում, որից մեկը տեղի էր ունեցել երեկ, 6–ն՝ այսօր։
Ըստ ԿԸՀ կայքում նախքան վերահաշվարկը տեղադրված արձանագրության՝ ընտրություններին մասնակցել է 2615 մարդ, անվավեր է ճանաչվել 49 քվեաթերթիկ. «Քաղաքացիական պայմանագիր» կուսակցությունը ստացել էր 1280 ձայն, «Շանթ դաշինք»-ը՝ 949, «Ապրելու երկիր»-ը՝ 337:
