ՀՀ ԱԺ նախագահ Ալեն Սիմոնյանի հրաժարականի հարց չի քննարկվում։ Այս մասին դեկտեմբերի 8-ին լրագրողների հետ զրույցում ասաց իշխող «Քաղաքացիական պայմանագիր» կուսակցությունից ՀՀ ԱԺ փոխխոսնակ Ռուբեն Ռուբինյանը։
Նա պարզաբանեց, որ երեկ հրապարակված տեսանյութում Սիմոնյանի խոսքերը հայտարարություն չեն այն առումով, որ դա մասնավոր զրույց էր:
Նրա խոսքով` Ալեն Սիմոնյանն այնտեղ ասում է, որ գերիներին չի կարելի հերոսացնել կամ նվաստացնել, պետք է այնպիսի հրապարակային դիսկուրս մշակել, որ հայ զինծառայողներն առանց կռվի գերության մեջ չընկնեն։
Ռուբինյանը հավելեց, որ Հայաստանի դիրքորոշումը բանտարկյալների նկատմամբ լեգիտիմ է եւ բխում է միջազգային իրավունքից, եւ ոչ մի ճիշտ կամ ոչ ճիշտ հայտարարություն չի կարող ազդել դրա վրա, քանի որ Ադրբեջանը պարտավոր է վերադարձնել գերիներին։
«Մենք պետք է ամեն ինչ անենք, որպեսզի անհապաղ Հայաստան վերադարձնենք նոյեմբերի 9-ի հայտարարության խախտմամբ Ադրբեջանում ապօրինի պահվողներին։ Սա քննարկման ենթակա չէ: Միաժամանակ բանտարկյալների թեման շատ զգայուն է։ Միշտ պետք է պարզել գերության մեջ գտնվելու հանգամանքները, դրա համար կա Քրեական օրենսգիրք»,- ասաց նա։
Փոխխոսնակն ընդգծեց, որ ռազմագերիների հարցը պետք է հնարավորինս քիչ բարձրացնել հանրային հարթությունում, քանի որ Ադրբեջանը փորձում է այդ թեման օգտագործել շանտաժի համար։
«Մենք չենք ուզում, որպեսզի գերեվարված զինվորներն իրենց նվաստացած զգան, բայց նաեւ ուզում ենք, որ մեր հասարակությունն իմանա, որ գերեվարումը լավ երեւույթ չէ։ Այս ընթացքում ամենաբարձր մակարդակով մի շարք հանդիպումներ են կազմակերպվել գերիների հարազատների հետ, ուստի ընդդիմության միջնորդությունն այս հարցում չի պահանջվում»,- եզրափակեց նա։
