Ռուսաստանի Դաշնության օդատիեզերական ուժերը 2021 թվականին անցկացված զորավարժությունների ժամանակ հաշվի են առել Լեռնային Ղարաբաղում հակամարտության ընթացքում հետախուզական եւ հարվածային անօդաչու թռչող սարքերի կիրառման փորձը։ Այս մասին հայտարարել է ՌԴ օդատիեզերական ուժերի հատուկ նշանակության հակաօդային եւ հակահրթիռային պաշտպանության բանակի հրամանատար, գեներալ-լեյտենանտ Անդրեյ Դեմինը։
«ՀՕՊ զորամասերում մարտական պատրաստությունը կազմակերպվում է պլանային զորավարժություններով եւ կատարելագործվում հակաօդային պաշտպանության կազմավորումների եւ զորամասերի հետ վարժանքների ժամանակ։ Հաշվի է առնվել Լեռնային Ղարաբաղի հակամարտության փորձը, որտեղ առաջին անգամ զանգվածաբար կիրառվել են հետախուզական եւ հարվածային անօդաչու թռչող սարքեր»,- ասել է նա «Նեզավիսիմոե վոեննոե օբոզրենիե» շաբաթաթերթին տված հարցազրույցում։
Նրա խոսքով՝ 2021 թվականին Սիրիայում ռուսական օդատիեզերական ուժերի ձեռք բերած փորձը ներդրվել է «Աշուլուկ» եւ «Տելեմբա» զինափորձարաններում մարտավարական վարժանքների ժամանակ:
«Բացի այդ, հատուկ ուշադրություն է դարձվել անօդաչուներին հակազդելու համար զորքերի պատրաստությանը` հաշվի առնելով ՍԱՀ-ում եւ Հայաստանի Հանրապետությունում զինված հակամարտությունների փորձը», - ընդգծել է Դեմինը:
