«Լուկօյլ»-ը կկրճատի Petronas-ից ձեռք բերված բաժնետոմսերը Շահ Դենիզ նախագծում` 15.5 տոկոսից մինչեւ 9.99 տոկոս, նախագծի գործընկերների հետ սեփականության իրավունքի պահպանման հարցի շուրջ բանակցություններից հետո, փոխանցում է ՏԱՍՍ-ը։
Ընդ որում, գործարքի գումարը 2.25 մլրդ դոլարից կնվազի համապատասխանաբար մինչեւ 1.45 մլրդ դոլար։ Գործարքը նախատեսվում է փակել 2022 թվականի հունվարին:
Գործարքի մասին հայտարարվել է 2020 թվականի հոկտեմբերին։ Այդ ժամանակ «Լուկօյլ»-ը մտադիր էր գնել նախագծում 15.5 տոկոսը եւ այդպիսով իր մասնաբաժինը 10 տոկոսից հասցնել 25.5 տոկոսի։ Սակայն դեկտեմբերին բրիտանական BP-ն, որը հանդիսանում է նախագծի օպերատորը, ունենալով 28.8 տոկոս բաժնեմաս, որոշեց ավելացնել իր մասնաբաժինը 1.16 տոկոսով՝ 168 մլն դոլարի դիմաց։
Շահ Դենիզ գազակոնդենսատային հանքավայրը գտնվում է Կասպից ծովի ադրբեջանական հատվածում՝ Բաքվից 70 կմ հարավ-արեւելք։ Ծրագիրն իրականացվում է արտադրության բաշխման համաձայնագրի համաձայն: Ծրագրի շրջանակներում կոմերցիոն արտադրությունը սկսվել է 2006 թվականին:
Շահ Դենիզ նախագծի մյուս մասնակիցներն են բրիտանական BP-ն (օպերատոր, մասնաբաժինը` 28.8 տոկոս), թուրքական TPAO-ն (19 տոկոս), ադրբեջանական Socar-ը (10 տոկոս), իրանական NICO-ն (10 տոկոս) եւ ադրբեջանական SGC-ն (6.7 տոկոս):
