Այսօր՝ դեկտեմբերի 10-ին, «Հայաստանի ազգային արխիվ» ՊՈԱԿ-ի տնօրեն Գրիգոր Արշակյանն առցանց ձևաչափով մասնակցել է Բելառուսում անցկացվող ԱՊՀ անդամ պետությունների պետական արխիվային ծառայությունների ղեկավարների խորհրդակցական խորհրդի 17-րդ նիստին։
Բելառուսի, Ռուսաստանի, Հայաստանի, Ուզբեկստանի, Ադրբեջանի, Ղազախստանի, Ղրղզստանի, Տաջիկստանի ներկայացուցիչները հանդես են եկել իրենց երկրներում 2020-2021թթ․ արխիվային գործի զարգացման արդյունքների մասին զեկույցներով։
Անդրադարձ է եղել 2020-2021թթ․ արխիվային օրենսդրության ոլորտում տեղի ունեցած փոփոխություններին, արխիվների տեխնիկական վերազինմանը, ներդրումային ծրագրերին, արխիվային փաստաթղթերի օգտագործմանը, միջազգային կապերին, արխիվային ոլորտի մասնագետների պատրաստման անհրաժեշտությանը և այլն։
Քննարկվել է նաև ԱՊՀ անդամ պետությունների անձնակազմին վերաբերող փաստաթղթերի պահպանման միասնական տվյալների բազայի ստեղծման հարցը։
Հայաստանի ազգային արխիվի տնօրեն Գրիգոր Արշակյանը ներկայացրել է ՀԱԱ արխիվային գործի 2020-2021թթ․ զարգացման գործընթացը և կարևորել ՀԱԱ-ի էլեկտրոնային շտեմարանի ստեղծման ծրագիրը, թվայնացման աշխատանքները, որոնց կիրառման շնորհիվ Հայաստանի արխիվային համակարգը հնարավորություն է ստացել կայուն կերպով իրականացնել ՀՀ արխիվային հավաքածուի և այլ արխիվային փաստաթղթերի համալրման, հաշվառման, պահպանության և օգտագործման հիմնական գործառույթները: Գրիգոր Արշակյանը նշել է, որ արխիվային փաստաթղթերի թվայնացման շնորհիվ կբացառվի առանձնապես արժեքավոր և հազվագյուտ փաստաթղթերի ոչնչացումը, կբարձրանա արխիվի աշխատանքի արդյունավետությունը, արխիվային հավաքածուն կդառնա առավել մատչելի ու հասանելի ՀՀ և արտերկրի քաղաքացիների, կազմակերպությունների, գիտական ուսումնասիրողների, իրավաբանական անձանց, պետական և տեղական ինքնակառավարման մարմինների համար:
Այնուհետև տեղի է ունեցել մտքերի փոխանակում ԱՊՀ անդամ պետությունների արխիվային գործի բնագավառում համագործակցության միջոցառումների ծրագրերի իրագործման շուրջ:
Նիստի ավարտին անցկացվել է ԱՊՀ անդամ պետությունների պետական արխիվային ծառայությունների ղեկավարների խորհրդակցական խորհրդի նախագահի ընտրություն։ Այս անգամ խորհուրդը կղեկավարի Ղազախստանի ներկայացուցիչը։ Պայմանավորվածություն է ձեռք բերվել հաջորդ նիստն անցկացնել 2022 թվականին, Ալմա Աթայում։
