ԱԺ պատգամավորներին ազատ արձակելու համար դատարանի որեւէ որոշման անհրաժեշտություն չկա: Այս մասին այսօր՝ դեկտեմբերի 10-ին, «ՎԲարդաշեն» ՔԿՀ-ի մոտ լրագրողների հետ զրույցում նշեց «Հայաստան» խմբակցության պատգամավոր Արամ Վարդեւանյանը:
«Ուղղակի նաեւ տեխնիկական իմաստով դատարանի որոշումն ավելի արագ տրամաբանությամբ պետք է գործի: Ավելին ասեմ, երեկ երեկոյան արդեն պետք է լինեին այդ դատական ակտերը, որոշումները եւ մեր ընկերները պետք է լինեին ազատության մեջ:
Խնդիրն այստեղ այն է, որ Արթուր Սարգսյանի եւ Մխիթար Զաքարյանի դեպքում դատավորները փաստացի այս պահին գործունեությունը չեն էլ կարող իրականացնել: Մխիթար Զաքարյանի դեպքում դատավորը բացարկ է հայտնել, Արթուր Սարգսյանի դեպքում էլ առկա է որոշակի առողջական խնդիրներ դատավորի մոտ: Հետեւաբար, այս դեպքում գործում է մեկ այլ ռեժիմ. Նույն դատախազությունն ունի լիազորություն ապահովելու կալանավորումների եւ պատժի կրման ընթցքում օրինականությունը: Սա է տրմաբանությունը: ՍԴ որոշմամբ արձանագրվեց, որ մեր ընկերների կալանավորումները օրինական չէ, եւ դրանով ամեն ինչ ասված է: ՔԿՀ-ն որեւէ հնարավորություն չունի պահելու մեր ընկերներին, որովհետեւ դրա հիմքը չունի»,-ասաց նա:
Նշենք, որ այս պահին ԱԺ պատգամավորների խումբ է ժամանել «Վարդաշեն» ՔԿՀ, որտեղից քիչ անց ազատ կարձակվեն Մխիթար Զաքարյանն ու Արթուր Սարգսյանը:
Ավելի վաղ NEWS.am-ը հայտնել էր, որ ՀՀ Սահմանադրական դատարանը նախօրեին հրապարակել է իր դեկտեմբերի 7-ի որոշումը, ըստ որի պատգամավոր ընտրված անձինք չեն կարող լինել անազատության մեջ:
Այսօր ավելի վաղ Երեւանի ընդհանուր իրավասության դատարանը՝ նախագահությամբ դատավոր Վահե Միսակյանի, որոշեց ազատ արձակել ԱԺ պատգամավոր Արմեն Չարչյանին: Նա ազատ արձակվեց նիստերի դահլիճից:
Դատավորը հայտարարեց, որ խափանման միջոց է ընտրվում ստորագրությունը չհեռանալու մասին: