Վիեննայում միջուկային գործարքի վերաբերյալ բանակցությունները փակուղի չեն մտել, կողմերը քննարկում են կարեւոր հարցերը։ Այս մասին երկուշաբթի մամուլի ասուլիսում ասել է Իրանի ԱԳՆ պաշտոնական ներկայացուցիչ Սայիդ Խաթիբզադեն։

«Վիեննայում փակուղի չկա, բանակցությունները շարունակվում են, ինչպես եւ մինչ այժմ,- ասել է նա։- Երբ բանակցային գործընթացը հասնում է լուրջ թեմաների շուրջ երկխոսության պահին, բանակցությունները դառնում են բարդ, եւ տեղի են ունենում որոշակի ձգձգումներ»։

Դիվանագետի խոսքով՝ այն, ինչ այժմ տեղի է ունենում Վիեննայում, կարելի է անվանել կարեւոր հարցերի քննարկում»։ «Այսօր անհրաժեշտ է քաղաքական որոշում կայացնել։ Թեհրանն այն կայացրել է շատ տարիներ առաջ, երբ միջուկային գործարքի մեջ էր, եւ այսօր մենք արեւմտյան կողմից սպասում ենք ներկայացված նախաձեռնությունների պատասխանը»,- ավելացրել է նա։

Կիրակի օրը Իրանի Ազգային անվտանգության բարձրագույն խորհրդի քարտուղար Ալի Շամհանին Թվիթերում գրել էր, որ Վիեննայում համաձայնագրի հասնելու աշխատանքը ավելի բարդ է դառնում։