Սումգայիթում հայերի ջարդերի մեղավորը հայերն են։ Հենց այսպես են Ադրբեջանում հերքում ոչ թե ջարդերի ու կոտորածի փաստն ինքնին, դա անհնար կլիներ հերքել, այլ պարզապես հայերի վրա են դնում հայերի հանդեպ իրականացված հրեշավոր հանցագործության մեղքը։
Այս հանցավոր դիրքորոշումը կրկնել է Ադրբեջանի ԱԳՆ մամուլի քարտուղար Լեյլա Աբդուլաեւան՝ մեկնաբանելով Հայաստանի արտաքին գործերի նախարարության հայտարարությունը ողբերգության տարելիցի հետ կապված։
«Քանի դեռ Հայաստանի կառավարությունը զբաղեցնում է փոխզիջման չգնալու դիրքորոշում՝ հիմնված ստի վրա, ցավոք, հայ ժողովուրդը զրկված կլինի խաղաղությունից եւ բարեկեցությունից»,- ասել է Աբդուլաեւան։ Նա մեղադրանքները համարում է «անհիմն» եւ «կեղծ»։
Վկայակոչելով «պաշտոնական տվյալները»՝ ԱՀ ԱԳՆ ներկայացուցիչը խոսում է 32 զոհվածի մասին։ Հիշեցնենք, որ ոչ պաշտոնական տվյալներով հարյուրավոր մարդիկ են զոհվել։ Որպես «գլխավոր փաստարկ» Աբդուլաեւան ներկայացրել է ադրբեջանական կողմից շրջանառության մեջ մտցված «հիմնավորումը» ջարդերին ինչ-որ հայերի հանցակցության մասին։
«Համագործակցության եւ խաղաղության հաստատման նոր հնարավորություններից օգտվելու փոխարեն, որոնք ներկայում ի հայտ են եկել օկուպացիայի գործոնի վերացումից հետո, անհիմն եւ թշնամական հայտարարություններն ի ցույց են դնում Հայաստանի իրական մտադրությունները»,- ասել է ԱԳՆ մամուլի քարտուղարը։
Աբդուլաեւայի տրամաբանությամբ՝ խաղաղության հասնելու համար Հայաստանը պետք է հրաժարվի զոհերի հիշատակից եւ հանցագործներին պատժելուց։