Հայաստանը շարունակում է հավատալ, որ ռուսական խաղաղապահ զորախումբը կկարողանա վերականգնել ստատուս քվոն, վերականգնել իրավիճակն այնպես, ինչպես այն մարտի 23-ի դրությամբ էր։ Այս մասին ՌԴ ԱԳ նախարար Սերգեյ Լավրովի հետ համատեղ ասուլիսին, պատասխանելով ղարաբաղյան Փառուխ գյուղ ադրբեջանական ուժերի ներխուժման մասին հարցին, հայտարարեց ՀՀ արտգործնախարար Արարատ Միրզոյանը:
«Ինչպես արդեն ասացի, խաղաղապահ զորախումբը տեղակայվել է Լեռնային Ղարաբաղի շուրջ՝ 2020 թվականի նոյեմբերի 9-ի իրավիճակով ստատուս քվոն ապահովելու եւ Լեռնային Ղարաբաղի բնակչության անվտանգությունն ապահովելու նպատակով։ Կրկնում եմ՝ մենք շարունակում ենք հավատալ, որ ստատուս քվոն կվերականգնվի եւ ռուսական խաղաղապահ զորախումբը կշարունակի կատարել իր կարեւորագույն գործառույթը՝ Լեռնային Ղարաբաղի բնակչության անվտանգությունն ապահովելու եւ երաշխավորելու կարեւորագույն առաքելությունը»,- հայտարարեց Միրզոյանը։