Հոկտեմբերի 21-ին «Հայկական ժամանակ» օրաթերթի գլխավոր խմբագիր Նիկոլ Փաշինյանին Շենգավիթի ընդհանուր իրավասության դատարանի դահլիճում կրկին դիմավորեցին ծափահարություններով:
Դատական նիստի հենց սկզբում հայտարարությամբ հանդես եկավ պաշտպան Լուսինե Սահակյանը, որը նշեց, թե դատավոր Մնացական Մարտիրոսյանի կամքով լրագրողների համար նորմալ աշխատանքային պայմաններ ապահովված չեն, ավելին, լուսանկարիչները չեն կարողանում լուսանկարահանումներ իրականացնել: «Լուսանկարելու միակ հնարավորությունը լրագրողների համար առանձնացված սենյակում տեղադրված հեռուստաէկրանից նկարելն է, բայց այդ կադրերը ենթակա չեն օգտագործման»,- նշեց պաշտպանը: Վերջինս նաեւ հանգամանալից ներկայացրեց դատավորի կատարած ապօրինությունները, բայց նկատեց, որ անիմաստ են համարում ինքնաբացարկի միջնորդություն ներկայացնելը, քանի որ համոզված են, որ նա անպայման կմերժի միջնորդությունը:
Այնուհետեւ իր անձնական տվյալները ներկայացրեց Նիկոլ Փաշինյանը: Հարցին, թե ինչ կրթություն ունի, Փաշինյանը պատասխանեց. «Դժվար է ասել»՝ արժանանալով ներկաների բուռն ծիծաղին: Հիշեցնենք, որ բացարձակ գերազանցիկ Փաշինյանին 1995թ. հեռացրել էին համալսարանից՝ ընդդիմադիր հայացքների համար: Իսկ հարցին, թե երբ է ձերբակալվել՝ Փաշինյանը պատասխանեց. «Հուլիսի 1-ին: Ի դեպ, կալանքը ես եմ ընտրել որպես խափանման միջոց, եւ ներկայումս գործունեություն եմ ծավալում „Երեւան-Կենտրոն“ ՔԿՀ-ում»: Հիշեցնենք, որ նա ինքնակամ էր ներկայացել իրավապահներին՝ մեկուկես տարի ընդհատակում գտնվելուց հետո:
Նիկոլ Փաշինյանը նաեւ ինքնաբացարկի միջնորդություն ներկայացրեց մեղադրող Կորյուն Փիլոյանին, նշելով, որ վերջինս անաչառ լինել չի կարող եւ կանխակալ վերաբերմունք ունի: Ըստ Փաշինյանի՝ 13 հատորանոց քր.գործում իր մեղքն ապացուցող որեւէ փաստ հնարավոր չէ գտնել, մինչդեռ Փիլոյանն անձամբ հաստատել մեղադրական եզրակացությունը: "Փոխանակ բացահայտելու մարտի 1-ի իրական մեղավորներին, մարդասպաններին, Փիլոյանը, ըստ Փաշինյանի՝ կոծկում է դրանք, քանի որ մարտի 1-ը կոռուպցիոն բուրգի կազմակերպածի մի մասնիկն է: Փաշինյանի միջնորդությանը միացան նաեւ պաշտպաններ Երվանդ Վարոսյանն ու Լուսինե Սահակյանը: Կողմերին լսելուց հետո դատավոր Մնացական Մարտիրոսյանը երկու ժամով ընդմիջում հայտարարեց եւ գնաց միջնորդությունը քննարկելու:
Նշենք, որ դրսում հավաքվել էին ընդդիմության մի քանի հարյուր ակտիվիստներ, որոնց ոստիկանությունն արգելեց մտնել դահլիճ, թեեւ դահլիճը կրկին կիսադատարկ էր: Ի դեպ, ոստիկանների գործողությունները համակարգում էր ՊՊԾ գնդի հրամանատար Ռոբերտ Մելքոնյանը, որը, սակայն, Փաշինյանի գործով հանդես է գալիս որպես վկա եւ իրավունք չուներ գտնվել դատարանի տարածքում:
