Եկել է Եվրասիական տնտեսական մեծ համագործակցության տնտեսական զարգացման համապարփակ ռազմավարություն ձեւավորելու ժամանակը, որը կարտացոլի բոլոր հիմնական միջազգային մարտահրավերները, ասել է ՌԴ նախագահ Վլադիմիր Պուտինը՝ ելույթ ունենալով տեսակոնֆերանսի ձեւաչափով Եվրասիական տնտեսական ֆորումի լիագումար նիստում, փոխանցում է «ՌԻԱ Նովոստին»։
«Եկել է եվրասիական մեծ գործընկերության զարգացման համապարփակ ռազմավարություն ձեւավորելու ժամանակը, որը պետք է արտացոլի մեր առջեւ ծառացած հիմնական միջազգային մարտահրավերները, ինչպես նաեւ սահմանի երկարաժամկետ նպատակներ, պարունակի դրանց հասնելու գործիքներ եւ մեխանիզմներ»,- ասել է Պուտինը։
Մասնավորապես, նրա խոսքով, անհրաժեշտ է առեւտրային եւ ներդրումային համաձայնագրերի համակարգի մշակման հետագա քայլեր մտածել, այդ թվում՝ ՇՀԿ-ի, ՀԱԱՊԱ-ի եւ ԲՌՀՉՀ-ի անդամ երկրների մասնակցությամբ։ «Իրականում կարելի է խոսել ԱՀԿ կանոնները մշակող եւ լրացնող նոր համաձայնագրերի ձեւավորման մասին, որոնց շրջանակներում կարեւոր է ուշադրություն դարձնել ոչ միայն սակագներին, այլեւ ոչ սակագնային խոչընդոտների վերացմանը, ինչը կարող է ունենալ ավելի էական ազդեցություններ՝ առանց ազգային տնտեսությունները ռիսկերի ենթարկելու»,- նշել է ՌԴ նախագահը։
Նա մի շարք առաջարկներ է հնչեցրել գործընկերային հարաբերությունների զարգացման համար։ Մասնավորապես, նա առաջարկել է մտածել Եվրասիական արտահանման կենտրոնի եւ առեւտրի տների ստեղծման, եվրասիական վերաապահովագրող ընկերության ստեղծման աշխատանքների արագացման մասին եւ ուսումնասիրել միջսահմանային հատուկ տնտեսական գոտիների զարգացումը, գուցե նույնիսկ վերազգային լիազորություններով։
«Կարեւոր է ակտիվորեն զարգացնել համագործակցությունը ԵԱՏՄ-ի եւ արտասահմանյան գործընկերների միջեւ, նրանց տեղեկացնել ԵԱՏՄ-ի աշխատանքի օգուտների եւ առավելությունների, մեր հիմնական նախագծերի եւ ծրագրերի մասին: Գործընկերները գիտեն, որ մեր միավորման նկատմամբ հետաքրքրությունն աճում է։ Այս համատեքստում իր ծանրակշիռ դերը կարող է խաղալ ԵԱՏՄ Գործարար խորհուրդը, որն արդեն հաջողությամբ զարգացնում է կապերը միության շրջանակից դուրս, բիզնես երկխոսությունների նրա համակարգը կարող է օրինակ դառնալ Մեծ Եվրասիայում գործարար համագործակցության պոտենցիալ հարթակի համար»,- ասել է Պուտինը։
«Միաժամանակ, ինչպես արդեն ասացի, ցանկալի է աջակցել գործարար նախաձեռնության ազատությանը, բիզնեսի ստեղծարար գործունեությանը, մեր ներդրողներին։ Առաջարկում եմ նրանց համար ձեւավորել լրացուցիչ, ավելի որակյալ խթաններ, ավելի ակտիվ մասնակցել եվրասիական նախագծերի ֆինանսավորմանը։ ԵԱՏՄ երկրների ազգային բիզնեսները ներկայացնող ընկերությունները, իհարկե, այստեղ պետք է առաջնահերթ աջակցություն ստանան»,- ընդգծել է նա։
