Ճապոնիայի կառավարությունը կողմ է ռուսական նավթի ներկրման վրա մասնակի էմբարգո սահմանելու ԵՄ երկրների որոշմանը: Այս մասին երեքշաբթի Տոկիոյում կայացած մամուլի ասուլիսին հայտարարել է նախարարների կաբինետի գլխավոր քարտուղար Հիրոկաձու Մացունոն։
«Նավթի արտահանումը Ռուսաստանի համար արտարժույթ ստանալու կարեւոր միջոց է, եւ ես ողջունում եմ այն որ Եվրամիությունը համաձայնել է համատեղ աշխատել այնպիսի միջոցների ուղղությամբ, որոնք էլ ավելի կնվազեցնեն մեր էներգետիկ կախվածությունը Ռուսաստանից»,- ասել է նա։
Մացունոն նաև հիշեցրել է, որ Ճապոնիան աջակցում է Ռուսաստանի Դաշնությունից էներգառեսուրսների հարցում կախվածությունը նվազեցնելու է Յոթնյակի (G7) երկրների ձգտմանը: «Դա շատ դժվար որոշում էր մեր երկրի համար, որը գրեթե ամբողջությամբ կախված է նավթի ներկրումից, բայց այժմ այնպիսի ժամանակ է, երբ G7-ի միասնությունը չափազանց կարեւոր է»,- ասել է նա:
Եվրամիության պետությունների եւ կառավարությունների ղեկավարները երկուշաբթի համաձայնեցրեցին Ռուսաստանի դեմ պատժամիջոցների վեցերորդ փաթեթը, որը, մասնավորապես, ռուսական նավթի ներմուծման վրա մասնակի էմբարգո եւ Սբերբանկի` SWIFT տեղեկատվության փոխանցման եւ վճարումների կատարման միջազգային միջբանկային համակարգից անջատում է ներառում:
Ինչպես Բրյուսելում լրագրողներին հայտնել է Եվրոպական խորհրդի ներկայացուցիչը, դա քաղաքական որոշում է, որին պետք է տեխնիկական ընթացակարգ հետեւի։ Միայն դրա ավարտից հետո որոշումը կհրապարակվի ԵՄ պաշտոնական ամսագրում եւ ուժի մեջ կմտնի։ Այդ սահմանափակումների ներդրման ստույգ ժամկետները դեռ չեն հայտարարվել։
