Մեծ Բրիտանիան դիտարկում է Ուկրաինա լրացուցիչ հականավային հրթիռներ ուղարկելու հարցը՝ ի լրում արդեն իսկ խոստացված զենքի: Այս մասին հայտարարել է երկրի պաշտպանության նախարար Բեն Ուոլեսը, փոխանցում է Reuters-ը։
Նա ասել է, որ համազարկային կրակի ռեակտիվ համակարգերի (ՀԿՌՀ) մատակարարումը, որը Մեծ Բրիտանիան խոստացել է Ուկրաինային, «մոտ է», եւ որ Լոնդոնը դիտարկում է ավելի շատ զենք ուղարկելու հնարավորությունը:
Նրա խոսքով՝ ուկրաինացի զինվորականների վերապատրաստումը նույնքան կարեւոր է դառնում, որքան զենք ուղարկելը, եւ պատրաստության առումով անհրաժեշտ է ավելին անել։ «Ուկրաինական ուժերը երկրի արեւելքում… Նրանցից ոմանք 90 օր է՝ այս ճակատում են, նրանք ուժասպառ են… Կարեւոր է օգնել Ուկրաինային առաջին գծում մարդկանց փոխարինելու իր կարողությամբ», - ասել է Ուոլեսը:
Նա հայտնել է, որ հաջորդ շաբաթ կմեկնի Թուրքիա՝ «Իսլամական պետությունը» եւ Սիրիան, Շվեդիայի եւ Ֆինլանդիայի՝ ՆԱՏՕ-ին անդամակցության հայտերը, որոնց դեմ է Անկարան, եւ Ուկրաինայից հացահատիկի արտահանումը քննարկելու համար:
Մեծ Բրիտանիան Թուրքիային որպես Օդեսայից հացահատիկի արտահանման նավային ուղիների վերաբերյալ ցանկացած գործարքի հնարավոր երաշխավոր է դիտարկում։ Ինչ վերաբերում է Շվեդիայի եւ Ֆինլանդիայի՝ ՆԱՏՕ-ին անդամակցությանը, Ուոլեսն ասել է, որ «կարեւոր է լսել Թուրքիայի մտահոգությունները»:
