Ստարտափների համար ֆինանսավորումից ավելի կարևոր է ստարտափային էկոհամակարգի ստեղծումը, որպեսզի երիտասարդ ստարտափները խորհուրդներ ստանան մեծ ընկերություններից: Այս մասին NEWS.am-ի հետ զրույցում նշեց «ՀայՀաբ» ստարտափի հիմնադիր-տնօրեն Ռադո Բարսեղյանը:
«Որպես ստարտափ՝ երկար ժամանակ ֆինանսավորում չէինք գտնում, որովհետև երբ գաղափարը սկզբնական փուլում է, շատ դժվար է ֆինանսավորում գտնել: Առաջին ներդրումը, որ բերեցինք մեր ստարտափում, մեկ քառորդ միլիոն դոլարն էր, ինչի հետևանքով ստարտ տվեցինք, իսկ հետագա ներդրումները եղել են մեր, ընկերներիս, ընտանիքիս միջոցներով: Մեր հիմնական ներդրումային գրավչությունն այն էր, որ ուզում են աշխարհահռչակ ընկերություն ստեղծել»,- ասաց նա:
«ՀայՀաբ»-ն իր գործունեությունը հայաստանյան շուկայում սկսել է բոլորովին վերջերս՝ շուրջ մեկ տարի առաջ: «Բավականին վաղ փուլում ենք. այն գաղափարները, որոնք մենք ենք ցանկանում իրականացնել՝ աշխարհի տարբեր շուկաներում հայտնվելն է: Մենք արագ զարգացանք հայաստանյան շուկայում. տասն ամիսների ընթացքում մենք շրջանառել ենք շուրջ մեկ մլն. դոլար»,- նշեց նա:
Ռադո Բարսեղյանը հույս ունի, որ ընկերությունը ապագայում մրցակցային դիրքեր կգրավի համաշխարհային ընկերությունների շարքում՝ շնորհիվ նորարարական գաղափարների:
Ստարտափների զարգացմանն աջակցելու համար, ըստ Բարսեղյանի, պետությունը կարող է հարկային արտոնություններ սահմանել, բայց ֆինանսավորումից բացի կարևոր է նաև համապատասխան էկոհամակարգի ձևավորումը: «Ստարտափերի համար կարևոր է ստարտափային էկոհամակարգի ստեղծումը, որպեսզի երիտասարդ ստարտափները ստանան խորհուրդներ մեծ ընկերություններից: Ինձ թվում է, որ Հայաստանում այդ բացը շատ կա»,- նշեց նա:
Մանրամասները դիտեք տեսանյութում։