Թուրքիայի հետ հարաբերությունների կարգավորման բանակցությունների ընթացքում Հայաստանը պաշտպանում է բացառապես իր շահերը եւ ոչ մի դեպքում դրանցից չի նահանջի։ Այս մասին հուլիսի 26-ին ԱԺ-ում լրագրողների հետ հանդիպման ժամանակ հայտարարեց ԵԱՀԿ ԽՎ-ում հայկական պատվիրակության անդամ, իշխող «Քաղաքացիական պայմանագիր» խմբակցության պատգամավոր Մարիա Կարապետյանը։
Պատգամավորին, մասնավորապես, հարցրեցին, թե ինչպես է Երեւանը վերաբերվում թուրք պաշտոնյաների հայտարարություններին այն մասին, որ Թուրքիան Հայաստանի հետ բանակցությունների հարցում իր մոտեցումներն Ադրբեջանի հետ համակարգմամբ է մշակում։ Պատգամավորն ի պատասխան ասաց, որ Անկարայի այդ մոտեցումը չպետք է զարմացնի որեւէ մեկին:
«Այն, որ Թուրքիան համաձայնեցնում է իր մոտեցումներն Ադրբեջանի հետ, չպետք է մեզ ինչ-որ շոկի մեջ գցի։ Նրանց հարաբերությունները մեզ համար գաղտնիք չեն։ Մեզ համար առաջնային նշանակություն ունեն Թուրքիայի հետ բանակցությունների արդյունքները։ Ե՛ւ Հայաստանը, ե՛ւ Թուրքիան արձանագրում են, որ բանակցություններն ընթանում են առանց որեւէ նախապայմանի։ Այս պահին կոնկրետ պայմանավորվածություն գոյություն ունի»,- շտապեց նշել Կարապետյանը։
