Ի հեճուկս այն բոլոր կանխատեսումների, որոնք կային թե ընտրություններից առաջ, թե հետո, որ այսօրվա իշխանությունը չի կարող բանակցել, բանակցային պրոցեսը շարունակվում է եւ հարեւան երկրից եւս խոսում են խաղաղության մասին: Այս մասին, այսօր՝ սեպտեմբերի 12-ին, ԱԺ-ում լրագրողների հետ զրույցում նշեց Ազգային ժողովի նախագահ Ալեն Սիմոնյանը՝ անդրադառնալով տեսակետին, որ Ադրբեջանը փորձում է սադրանքի համար լեգիտիմ հիմքեր ստեղծել:
«Մենք հետամուտ ենք լինելու խաղաղության գործընթացին,. Մենք գտնում ենք, որ առաջնային պետք է լուծենք անվտանգության հարցերը, իսկ դա լուծում են հարեւանների հետ խաղաղություն հաստատելով եւ ուժեղ բանակ ունենալով:
Մենք բանակի ուղղությամբ սկսած օրենսդրական նախաձեռնություններով, վերջացրած կադրային մեծ փոփոխություններով, առաջ ենք գնալու: Ակնհայտ է դարձել, որ մեծ փոփոխություններ կան եւ կարող եմ ասել, որ պաշտպանության նախարար Պապիկյանը շատ հաջող իր աշխատանքը կատարում է»,-ասաց Սիմոնյանը:
Ինչ վերաբերում է նոր օրինագծին, որով 4,5 ամիս բանակում ծառայելուց հետո կարելի է վճարել 24 մլն դրամ ու ազատվել հետագա ծառայությունից, Ալեն Սիմոնյանն ասաց. «Իմ կարծիքն այն է, որ հզոր ու արհեստավարժ բանակ ունենալու համար մնք պետք է բանակը դնենք արհեստավարժ հիմքերի վրա; Այսօր շատ մարդիկ տարբեր ձեւակերպումներով ազատվել են բանակից, կարծում եմ՝ այդ գումարը մեզ թույլ կտա ավելի պրոֆեսիոնալ զինվորականներ ունենալ: Նման ձեւով մեկ զինվորի «ազատվելը» հնարավորություն կտա երկու արհեստավարժ զինվորական կարողանալ ունենալ, եւ ինքն ավելի մարտունակ կլինի»:
Ալեն Սիմոնյանն անդրադարձավ նաեւ Ադրբեջանի հետ հարաբերություններին. «Մենք մինչ օրս բոլոր հիմնական հարցերի առումով կարողացել ենք մեր դիրքորոշումը պահպանել: Մեզ համար կան կարմիր գծեր, դրանք հայտնի են Ադրբեջանին, նաեւ մեր հանրությանը: Մենք մնալու ենք այդ տրամաբանության մեջ եւ աշխատել»:
Ինչ վերաբերում է սահմանային լարվածությանը, ԱԺ նախագահն ասաց, որ նման լարվածություններ թե հանդիպումներից առաջ են լինում, թե հետո. «Բանակցությունների վրա ինչ-որ ազդեցություն ունենալու համար են լինում, դա արդեն հայտնի ձեռագիր է: Հիմա էլ զորավարժությունների են պատրաստվում: Մեր ընկալումն է ուշի ուշով հետեւել, ամեն րոպե պատրաստ լինել ցանկացած զարգացման: Թող որեւէ մեկի մոտ տպավորություն չլինի, թե մենք մտածում ենա, թե բոլոր հարցերը լուծված են: Մենք մշտապես սպասում ենք, որ Ադրբեջանի կողմից որեւէ սադրանք կարող է լինել»:
Անդրադառնալով այսպես կոչված, «Զանգեզուրի միջանցքին», Ալեն Սիմոնյանն ասաց. «Հայաստանի համար դա կարմիր գիծ է եւ քննարկման ենթակա չէ: Բոլոր կետերը, որ կան նոյեմբերի 9-ի հայտարարության մեջ, Հայաստանը իրագործում է: Ադրբեջանի քաղաքացիները, բեռները կարող են տեղափոխվել Նախջեւան Հայաստանի օրենքների համապատասխան: Միջանցք ձեւակերպումը չի կարող լինել»:
Այդուհանդերձ, ըստ նրա, բանակցություններն Ադրբեջանի հետ շարունակվում են, որեւէ փակուղի չկա, հիմնական հարցերի վերաբերյալ ընկալումները հասկանալի են: «Ադրբեջանը բոլոր հնարավոր տեղերում փորձելու է ճնշումներ բանեցնել, մենք էլ բոլոր հնարավոր տեղերում այդ ճնշումները կանխել ենք, կանխելու ենք եւ Հայաստանի ու Արցախի շահերն առաջ ենք տանելու»: