ՀՀ ոստիկանությանը պետք է փաստացի եւ պոտենցիալ անչափահաս իրավախախտների նկատմամբ վերահսկողության հստակ լիազորություններ տրվեն։ Այս մասին սեպտեմբերի 12-ին ԱԺ նիստին «Ոստիկանության մասին» օրենքում լրացումներ կատարելու մասին օրինագծի քննարկման ժամանակ ասաց փոխոստիկանապետ Արա Ֆիդանյանը։
Նրա խոսքով՝ ոստիկանությունը մինչեւ հիմա չունի անչափահաս իրավախախտներին գրանցելու ֆորմալ չափանիշներ։ Այդ օրինագիծը, ինչպես նշեց Ֆիդանյանը, պարզապես անհրաժեշտ կոնկրետ չափանիշներ է սահմանում։
«Դրանք երեխաներ են, ովքեր տարվա ընթացքում կամ հանցագործություն կամ երկու եւ ավել վարչական իրավախախտումներ են կատարել»,- պարզաբանեց փոխոստիկանապետը։
Նույն ցանկում ներառված են մինչեւ 16 տարեկան անձինք, ովքեր երկու եւ ավելի անգամ առանց թույլտվության լքել են իրենց տները եւ առանց որեւէ հիմնավոր պատճառի բաց են թողել ավելի քան 120 դաս։ Ցուցակում ներառվել են նաեւ թափառաշրջությամբ, մուրացկանությամբ, մոլախաղերով զբաղվող, թմրանյութեր եւ ալկոհոլ օգտագործող երեխաները։
«Վերահսկողություն կսահմանվի նրանց ծնողների կամ խնամակալների նկատմամբ»,- ասաց Ֆիդանյանը։