Վարչապետ Լիզ Թրասը կարծում է, որ էլեկտրաէներգիայի աճող հաշիվները մի «գին է, որն արժե վճարել» Մեծ Բրիտանիայի «երկարաժամկետ անվտանգության» ապահովման համար, հաղորդում է PA Media-ն:
Նա պնդում է, որ չի հորդորի բրիտանացիներին այս ձմռանը կրճատել էներգիայի սպառումը։
Թեեւ Թրասի երաշխիքը մի քանի միլիարդ ֆունտ սթեռլինգ արժե, այն թույլ չի տա տնային տնտեսությունների միջին տարեկան հաշիվները գերազանցեն 2500 ֆունտ սթեռլինգը, բայց երկիրն արդեն զգում է աճող գնաճի ցավը:
Թրասը հայտարարել է, որ Մեծ Բրիտանիան «չի կարող վտանգի ենթարկել մեր անվտանգությունը հանուն էժան էներգիայի»: «Ես ուզում եմ ասել, որ սա այն գինն է, որն արժե վճարել Բրիտանիայի համար, քանի որ մեր երկարաժամկետ անվտանգությունն առաջնային նշանակություն ունի»,- հավելել է նա:
Ֆրանսիայի նախագահ Էմանուել Մակրոնը կոչ է արել առաջիկա ամիսներին նվազեցնել էներգիայի սպառումը 10 տոկոսով, քանի որ ԵՄ-ն անդամ երկրներին խնդրում է կրճատել սպառումը այս ձմռանը:
Սակայն Թրասն ընտրությունը թողնում է սպառողներին: «Ոչ, մենք չենք խոսում էներգիայի նորմավորման մասին»,- ասել է նա լրագրողներին: «Իհարկե, ես միշտ աջակցում եմ էներգաարդյունավետության բարձրացման միջոցառումներին, ինչպիսին է տների ջերմամեկուսացումը, դրանում իմաստ կա, իսկ էներգիայի գներն ավելի բարձր են, քան նախկինում: Ձեռնարկությունները եւ տնային տնտեսությունները մեծ խթան ունեն ներդրումներ կատարելու էներգաարդյունավետության մեջ, բայց մենք ունենք էներգիայի հուսալի աղբյուրներ, ի վերջո յուրաքանչյուրն ինքն է որոշում ինչպես հաղթահարել խնդիրները»: