Հունաստանը հոկտեմբերին եւս 1,1 միլիարդ եվրո կվճարի՝ էլեկտրաէներգիայի վճարների սուբսիդիաների տեսքով՝ ձմռան նախաշեմին տնային տնտեսություններին եւ ձեռնարկություններին էլեկտրաէներգիայի գների աճի ազդեցությունից պաշտպանելու համար: Այս մասին հայտարարել է էներգետիկայի նախարար Կոստաս Սկրեկասը։
Ինչպես եւ այլ եվրոպական երկրներ, Հունաստանը վերջին ամիսներին պայքարում է էլեկտրաէներգիայի վճարների կտրուկ աճի դեմ, ինչը պայմանավորված է գազի գների սրընթաց աճով, հաղորդում է Reuters-ը:
Անցյալ տարվա սեպտեմբերից մինչ այժմ երկիրը ավելի քան 9 միլիարդ եվրո է հատկացրել էլեկտրաէներգիայի սուբսիդավորման համար, եւ այլ միջոցառումներ է նախաձեռնել, որպեսզի օգնի տնային տնտեսություններին, ձեռնարկություններին եւ ֆերմերներին վճարել էլեկտրաէներգիայի եւ գազի վարձերը:
«Կառավարությունը կշարունակի վարել այնպիսի քաղաքականություն, որը պաշտպանում է սպառողներին էներգետիկ պատերազմի ծայրահեղ բացասական ազդեցությունից, որը Ռուսաստանը վարում է Եվրոպայում»,- ասել է Սկրեկասը հեռուստաուղերձում՝ հայտարարելով օգնության նոր միջոցառումների մասին: «Մենք բոլորս միասին կպայքարենք գալիք ձմռան ամիսներին՝ ամբողջ Եվրոպայում ծավալվող էներգետիկ պատերազմի մարտահրավերներին դիմակայելու համար»:
Հոկտեմբերից կառավարությունը էլեկտրաէներգիայի 1,1 միլիարդ եվրո ընդհանուր գումարի սուբսիդավորման երեք սանդղակ կներկայացնի, ասել է Սկրեկասը։
Սկրեկասի խոսքով՝ սպառողները, ովքեր նախորդ տարվա համեմատ 15 տոկոսով կնվազեցնեն միջին օրական սպառումը, հավելյալ 50 եվրո սուբսիդիա կստանան մեկ մեգավատտ ժամի համար։
2000 կվտ/ժ-ից ավելի սպառող ձեռնարկությունների համար սուբսիդիան կկազմի 398 եվրո մեկ մեգավատտ/ժամի համար, իսկ ֆերմերների համար՝ 436 եվրո մեկ մեգավատտ/ժամի համար։
