Նորվեգիան կտեղակայի իր զինված ուժերը՝ իր նավթագազային օբյեկտները հնարավոր դիվերսիաներից պաշտպանելու համար այն բանից հետո, երբ մի քանի երկրներ հայտնեցին ռուսական «Հյուսիսային հոսք» գազատարներում միջադեպերի մասին, փոխանցում է Reuters-ը։
Երեքշաբթի «Հյուսիսային հոսք» խողովակաշարերում հայտնաբերված ենթադրյալ դիվերսիայի հետեւանքով գազի արտահոսքը ցնցեց էներգետիկ շուկաները եւ ուժեղացրեց անվտանգության հետ կապված մտահոգությունները:
Ներկայում Նորվեգիան Եվրոպային գազի խոշորագույն մատակարարն է եւ նավթի աշխարհի առաջատար մատակարարը: Այն ավելի քան 90 ծովային նավթի եւ գազի հանքավայրեր ունի, որոնց մեծ մասը միացված է մոտ 9000 կմ գազատարի ցանցին։
«Զինվորականներն ավելի նկատելի կլինեն Նորվեգիայի նավթագազային օբյեկտներում»,- մամուլի ասուլիսի ժամանակ ասել է վարչապետ Յոնաս Գար Շտյորեն։
Նրա խոսքով՝ որ ծովում նավատորմը կտեղակայվի օֆշորային կայանքները պաշտպանելու համար, մինչդեռ ցամաքում ոստիկանությունը կարող է մեծացնել իրենց ներկայությունը օբյեկտներում։
ՆԱՏՕ-ն եւ Եվրամիությունն ընդգծել են կարեւոր ենթակառուցվածքների պաշտպանության անհրաժեշտությունը եւ նախազգուշացրել «ուժեղ եւ համագործակցային պատասխանի» մասին նոր հարձակումների դեպքում:
Նորվեգիայի նավթի անվտանգության վարչությունը կոչ է արել ավելի մեծ զգոնություն ցուցաբերել ԱԹՍ-ների նկատմամբ, որոնք թռնում են նորվեգական ծովային նավթագազային հարթակների մոտով՝ նախազգուշացնելով, որ դրանք կարող են վթարների կամ կանխամտածված հարձակումների վտանգ ներկայացնել:
