![](img/news/72/44/39/default.jpg)
Ռուսաստանը սատարում է ծագած խնդիրները դաշնակցային ձեւով լուծելու, փոխշահավետ համագործակցությունը հետեւողականորեն առաջ տանելու Երեւանի ձգտմանը։ Այս մասին Հայաստանի խորհրդարանի նախագահ Ալեն Սիմոնյանի հետ հանդիպմանը հայտարարել է Դաշնության խորհրդի նախագահ Վալենտինա Մատվիենկոն։
ՌԴ Դաշնության խորհրդի մամուլի ծառայությունը հայտնում է, որ Մատվիենկոն նշել է դինամիկ եւ բովանդակալից քաղաքական երկխոսությունը, որը կառուցվել է Մոսկվայի եւ Երեւանի միջեւ՝ առաջին հերթին ամենաբարձր մակարդակով։
Դաշնության խորհրդի նախագահը գոհունակություն է հայտնել խորհրդարանների միջոցով ռուս-հայկական համագործակցության կապակցությամբ։ Մատվիենկոն դրական է գնահատել համագործակցության երկկողմ միջխորհրդարանական հանձնաժողովի աշխատանքը, որի 35-րդ հանդիպումը կայացել է այս տարվա հուլիսին՝ Կրասնոյարսկում։ «Հիմա արդեն կարեւոր է պատրաստել եւ համաձայնեցնել 36-րդ հանդիպման արդիական օրակարգը, որը նախատեսված է 2023 թվականի սկզբին՝ Հայաստանում»։
Մատվիենկոն նշել է նաեւ խորհրդարանական պատվիրակությունների բավականին արդյունավետ համագործակցությունը միջազգային հարթակներում եւ հետխորհրդային տարածքում ընդհանուր ինտեգրացիոն միավորումներում, որոնք ունեն խորհրդարանական հարթություն։ Առանձնահատուկ ուշադրության, ըստ Ռուսաստանի խորհրդարանի վերին պալատի ղեկավարի, պետք է արժանանա Հավաքական անվտանգության պայմանագրի կազմակերպության շրջանակներում ջանքերի միավորումը։ Դաշնության խորհրդի նախագահը Ալեն Սիմոնյանի ուշադրությունը հրավիրել է ԵԱՏՄ դերի աճի վրա։ Խոսք է եղել նաեւ տեղեկատվական տարածքում հակառուսական հռետորաբանության անթույլատրելիության մասին։
Զրույցի առանձին թեմա է դարձել հումանիտար ուղղությունը՝ ռուսական դասագրքերի քանակի ավելացումը, հանրապետությունում ռուսական դպրոցների ավելացումը եւ լեզվի ուսուցման որակի բարձրացումը։
«Սատարում ենք ծագած խնդիրները դաշնակցային ձեւով լուծելու, փոխշահավետ համագործակցությունը հետեւողականորեն առաջ տանելու Երեւանի ձգտմանը»,- վստահեցրել է Մատվիենկոն։